بەڕێوەبەرایەتی پۆلیسی سلێمانی دەستگیرکردنی 5 کەسی بە تۆمەتی فاڵگرتنەوە، نووشتەکردن و فێڵکردن ڕاگەیاند.
بەڕێوەبەرایەتییەکە ڕاگەیەنراوێکی لەمبارەیەوە بڵاوکردەوە و تێیدا هاتووە "مەفرەزەکانی بنکەی پۆلیسی ڕزگاری لە چەند گەڕەکێکی شاری سلێمانی پێنج تۆمەتباریان بەتۆمەتی فاڵگرتنەوە و نوشتەکردن و فێڵکردن دەستگیرکرد."
ئەوەشی خستەڕوو کە "دوای کۆکردنەوەی زانیاری پێویست و چاودێریکردنی چەند کەسێک کە لە چەند گەڕەکێکی شاری سلێمانی خەریکی فاڵگرتنەوە و نوشتەکردن و فریودانی ھاووڵاتیان بوون، پاش وەرگرتنی بڕیاری دادوەر مەفرەزەکانی بنکەی پۆلیسی ڕزگاری توانیان لە چەند ھەڵمەتێکی جیادا پێنج تۆمەتبار دەستگیربکەن."
هەروەها ڕایگەیاند: لە کاتی دەستگیرکردنی تۆمەتبارەکاندا دەست بەسەر چەندین پارچە کەلوپەلدا گیرا کە بۆ فاڵگرتنەوە و نوشتەکردن بەکاریانھێنابوو.
ئاماژەی بەوەشدا کە ھەریەک لە تۆمەتباران (ب. ع. غ لەدایکبووی 1966 - پ. ر. ئـ لەدایکبووی 1973 - ن. س. ئـ - ح. ح. ع لەدایکبووی 1947 – غ. ب. ع لەدایکبووی 1956) بەبڕیاری دادوەر ڕاگیراون و لێکۆڵینەوەکان لەگەڵیاندا بەردەوامە.
کۆمێنت (0)
تا ئێستا هیچ کۆمێنتێک نەکراوە.