ڕاوێژکارێكی باڵای حکوومەتی ھەرێم: یەکێک لە مەلەفەکانی سەردانی مه‌سرور بارزانی بۆ به‌ریتانیا پرسی بەرەنگاربوونەوەی داعش بووە

 ڕاوێژکارێکی حکوومەتی ھەرێمی کوردستان بۆ ماددەی 140 پێی وایە، ئاستەنگ ھەیە بۆ پێدانی چەکی پێشکەوتوو بە ھێزی پێشمەرگە و یەکێک لە مەلەفەکانی سەردانی حکوومەتی ھەرێمی کوردستانیش بۆ ئەورووپا و بەریتانیا پرسی ئەمنی و بەرەنگاربوونەوەی داعش بووە.
دژوار فایەق، ڕاوێژکاری باڵای حکوومەتی ھەرێمی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند: سەرۆکی حکوومەتی ھەرێمی کوردستان لە سەردانەکەی بۆ بەریتانیا چەند مەلەفێکی لەگەڵ خۆی بردووە، لەوانەش مەلەفی سیاسی و ئابووری و ھەتا پرسی کاریگەریی شەڕی ڕووسیا و ئۆکراینا و یەکێک لە تەوەرەکانی سەردانی بەڕێز مەسرور بارزانی مەلەفی ئەمنی و بەرەنگاربوونەوەی تیرۆریستانی داعشە لە عێراق.
ڕاوێژکاری سەرۆکایەتیی حکوومەت دەشڵێت: چەندین پرسی پەیوەست بە داعش ھەیە کە سەرۆکی حکوومەتی لەگەڵ بەرپرسانی بەریتانیادا باسی لێوە کردوون، چونکە ھەرێمی کوردستان ھێشتا لە بەرەنگاربوونەوە تیرۆریستانی داعش بەردەوامە و ھێرش و کردەوە تیرۆریستییەکانیان بەردەوامە، بەتایبەتی لە ناوچە کوردستانییەکانیەکانی دەرەوەی ئیدارەی حکوومەتی ھەرێمی کوردستان.
دژوار فایەق ڕوونیشی کردەوە: ھەندێ ناوچە ھەیە بەھۆی بۆشاییی ئەمنییەوە داعشی تێدایە و سوودی لە بۆشاییی ئەمنی بینیوە، ھەماھەنگیی نێوان پێشمەرگە و هێزەکانی عێراق وەک پێویست نییە بۆ بەرەنگاربوونەوەی داعش و پێویستە ئەو ناوچانە پڕ بکرێنەوە کە بۆشاییی ئەمنییان تێدایە، ھەروەھا پڕچەککردنی ھەرێمی کوردستان بە چەکی پێشکەوتوو، چونکە داعش ھەمان چەکی ئەمەریکا و سوپای عێراقی ھەیە، لە بەرانبەردا ئەو چەکە بە پێشمەرگە نەدراوە و لەلایەن عێراقەوە ئاستەنگ دروست دەکرێت، لەبەر ئەوە پێویستە وڵاتانی جیھان ھاوکاریی ھەرێمی کوردستان بکەن بۆ پێدانی چەکی پێشکەوتوو.