له‌لالیگادا ئه‌مشه‌و بارسێلۆنا ده‌بێته‌ میوانی ڕیاڵ بێتس

 
له‌ هه‌فته‌ی سیی و پێنجه‌می خولی ئیسپانیا، كاتژمێر 10ی ئه‌م شه‌و به‌كاتی هه‌ولێر، یانه‌ی بارسێلۆنا ده‌بێته‌ میوانی یانه‌ی ڕیال بێتیس.
بۆ خۆئاماده‌كردن بۆ یاریه‌كه‌، یاریزانانی بارسا دوایین یه‌كه‌ی مه‌شقیان به‌سه‌رپه‌رشتی ڕاهێنه‌ر چاڤی هێرناندیز سازكردو هه‌ریه‌ك له‌ جیرارد پیكێ به‌هۆی پێكان و مارك ئه‌ندرێ تیرشتیگنی گۆڵپارێز به‌هۆی نه‌خۆشی به‌شداریان له‌ مه‌شقه‌كان نه‌كرد، له‌ گه‌ڕی پێشووی لالیگا، بارسێلۆنا به‌ دوو گۆڵ به‌رامبه‌ر به‌ گۆڵێك له‌ ڕیال مایۆركای میوانی برده‌وه‌و كۆی خاڵه‌كانی له‌ پله‌ی دووه‌می ڕیزبه‌ندی یانه‌كان گه‌یانده‌ شه‌ست  وشه‌ش خاڵ.
 بێتیسیش به‌ په‌نجاوهه‌شت خاڵ له‌ پله‌ی پێنجه‌می ڕیزبه‌ند دێت و له‌ بیست و سێی مانگی ڕابردوودا، نازناوی جامی شای ئیسپانیای بۆ سێیه‌م جار له‌ مێژووی خۆی به‌ده‌ستهێنا.
 له‌ كۆنگره‌یه‌كی ڕۆژنامه‌وانیدا، چاڤی هێرناندیز ڕایگه‌یاند كه‌ ڕووبه‌ڕوو بوونه‌وه‌ی بێتیس ده‌رفه‌تێكی زێڕینه‌ بۆ تیپه‌كه‌ی تا به‌ وه‌ده‌ستهێنانی سێ خاڵی گرنگ پارێزگاری له‌ پله‌ی دووه‌می ڕیزبه‌ندی یانه‌كان بكه‌ن و بلیتی به‌شداریكردن له‌ ململانێكانی جامی سوپه‌ری ئیسپانیاو وه‌رزی داهاتووی چامپیۆنس لیگ به‌ده‌ست بێنن، چاڤی ئاشكراشی كرد كه‌ بێتیس تیپێكی به‌هێزه‌و به‌ شایسته‌ییه‌وه‌ نازناوی ئه‌م وه‌رزه‌ی جامی شای ئیسپانیای برده‌وه‌و له‌ یاری ئه‌م شه‌و به‌ ڕێڕه‌وی ڕێزلێنان پیرۆزبایی به‌ده‌ستهێنانی نازناوه‌كه‌یان لێده‌كه‌ن.