له‌پریمه‌رلیگدا تۆتنهام سه‌ركه‌وتنی به‌سه‌ر بێرنلی تۆماركرد

له‌گه‌ری سی وحه‌وت و پێش كۆتایی پریمه‌رلیگ، یانه‌ی تۆتنهام به‌گۆلێكی بێ به‌رامبه‌ر سه‌ركه‌وتنی به‌سه‌ر یانه‌ی بێرنلی تۆماركرد.
 له‌ده‌ستپێكی یاریه‌كه‌ یاریزانانی تۆتنهام به‌گوشاری چر ده‌ستیان به‌یاریكرد، دواجار له‌كۆتا خوله‌كی ئه‌م گێمه‌ تۆتنهام لێدانی سزای به‌ده‌ستهێنا، ئه‌ستێره‌ی ئینگلیزی هاری كین سه‌ركه‌وتوو بوو له‌جێبه‌جێكردنی لێدانه‌كه‌ و گۆلی پێشكه‌وتنی تۆماركرد، گێمی یه‌كه‌م تۆتنهام به‌گۆلێك له‌پێشه‌وه‌بوو.
 له‌گێمی دووه‌م ئاستی یاریه‌كه‌ خاوبوونه‌وه‌ی به‌خۆیه‌وه‌ بینی، یاریزانانی بێرنلی خۆراگربوون له‌به‌رده‌م هاری كین و هاورێكانی، به‌مجۆره‌ یاریه‌كه‌ به‌گۆلێكی بێ به‌رامبه‌ر به‌سه‌ركه‌وتنی یانه‌ی تۆتنهام ته‌واو بوو.
 به‌م بردنه‌وه‌یه‌ كۆی خاله‌كانی تۆتنهام بووه‌ شه‌ست و هه‌شت خاڵ و هاته‌ خانه‌ی چواره‌می ریزبه‌ندی، له‌به‌رامبه‌ردا بێرنلی له‌خانه‌ی چواره‌می پێش كۆتایی دێت و به‌جیاوازی گۆڵ له‌ناوچه‌ی دابه‌زین دووره‌.