ئەمڕۆ پێنجشەممه 2022/5/26 نێچیرڤان بارزانی، سەرۆكی هەرێمی كوردستان، بەشداری لە ڕێوڕەسمی دەرچوونی خولی (27)ی كۆلێژی سەربازیی دوودا لە زاخۆ كرد. لەم خولەدا (499) دەرچووی پێشمەرگە لە هەموو ناوچەكانی هەرێمی كوردستانەوە مەشق و ڕاهێنان و خوێندنی ئەكادیمییان تەواو كردووە و بە پلەی ئەفسەر لە ڕیزەكانی پێشمەرگەدا دەست بە خزمەت دەكەن.
كۆلێژی سەربازیی دوو لە زاخۆ كە بە ئەكادیمیای سەربازیی زاخۆ دەناسرێت، ساڵی 1996 دامەزراوە و سەر بە وەزارەتی بەرگریی عیراقە. یەكێك لە باشترین كۆلێژە سەربازییەكانە و چەندین جار لەسەر ئاستی عیراق پلەی یەكەمی به دەست هێناوە.
لە ڕێوڕەسمەكەدا كە ژمارەیەك لە بەرپرسانی باڵای حكوومی و حزبی و سەربازی ئامادە بوون، نێچیرڤان بارزانی وتەیەكی پێشكەش كرد. تیایدا وێڕای پیرۆزبایی و دەستخۆشی لە دەرچووان و مامۆستایان و ڕاهێنەران، جەختی لە گرنگی و پێویستیی یەكخستنەوەی پێشمەرگە كردەوە و داوای كرد پارتی دیموكراتی كوردستان و یەكێتیی نیشتمانیی كوردستان بۆ ئەمە مەبەستە هاوكاری بكەن و دەستێوەردان لە كاروباری پێشمەرگەدا بوەستێنن.
هەر دەربارەی پرۆسەی یەكخستنەوەی پێشمەرگە، باسی لەو هەنگاوانە كرد كه تا ئێستا نراوان و ژمارەیەك لە هێزەكانی پێشمەرگە یەك خراونەتەوە، بەڵام جەختی لەوە كردەوە كە ئەوە بەس نییە و خەڵكی كوردستان و دۆستانی هەرێمی كوردستان لە كۆمەڵگەی نێودەوڵەتی، چاویان لەوەیە پرۆسەكە باشتر بەڕێوە بچێت.
بەڕێزیان ئاماژەی بە بەردوەامیی مەترسییەكانی داعش و پێویستیی هاریكاری و هەماهەنگیی زیاتری نێوان پێشمەرگە و سوپای عیراق كرد، بەتایبەتیش لە ناوچەكانی سنووری مادەی 140ی دەستوور كە بۆشاییی ئەمنی تێدا هەیە و تیرۆرستان سوودی لێ دەبینن. هەروەها ئاماژەی بە ڕۆڵی پێشمەرگە لە تێكشكاندنی داعشدا كرد.
لە بەشێكی دیكەی وتەكەیدا نێچیرڤان بارزانی، باسی لە گرنگیی گفتوگۆ و لێكگەیشتنی نێوان لایەنە كوردستانییەكان كرد و لەمبارەوە ئاماژەی بە كۆبوونەوەی دوێنێی پارتی دیموكراتی كوردستان و یەكێتیی نیشتمانیی كوردستان كرد و بە كۆبوونەوەیەكی باشی لە قەڵەم دا، هەروەها هیوای خواست دیدار و كۆبوونەوەی زیاتر بۆ یەكڕیزی و تەبایی لەنێوان لایەنە سیاسییەكاندا ئەنجام بدرێن و گوتی: زەمینەیەكی باش بۆ نەهێشتنی ناكۆكییەكان هەیە.
دۆخی عیراق و چەقبەستوویی و بنەبەستی سیاسی لە وڵات، تەوەرێكی دیكەی وتەی بەڕێز سەرۆكی هەرێمی كوردستان بوو. تیایدا باسی لە كاریگەرییەكانی دۆخەكە بەسەر ژیان و گوزرانی خەڵك و دۆخی هەرێمی كوردستانەوە كرد و جەختی لە پێویستیی هاریكاریی نێوان هەموو لایەنە عیراقییەكان كرد بۆ تێپەڕاندنی سەختییەكان و چارەسەركردنی كێشەكان.
لە دوا بەشی وتارەكەیدا نێچیرڤان بارزانی، وێڕای دووپاتكردنەوەی ئامادەیی و جددییەتی حكوومەتی هەرێمی كوردستان بۆ چارەسەركردنی كێشەكان لەگەل بەغدا لەسەر بنەمای دەستووری عیراق، داوای لە حكوومەتی فیدرالی و دامەزراوە عێراقییەكان كرد ئەگەر هاووڵاتییانی هەرێمی كوردستان بە هاووڵاتیی عێراق دەبینن، كۆتایی بە فشارەكانی سەر هەرێمی كوردستان بهێنن.
ئەمە دەقی وتەكەیە:
ئامادەبوویێن ڕێزدار،
پێشمەرگێن قەهرەمان،
فەرماندار و مامۆستا و ڕاهێنەرێن ڕێزدار،
دەرچوویێن خۆشتڤی یێن خولا (27)ێ یا بنەڕەتی ل كۆلیژا سەربازی یا دو ل زاخۆ،
كەسوكارێن ڤان عەزیزا،
هەمی لایەك ب خێر بێن، سەر چاڤا
بخێرهاتنا نێردەیێن ولاتێن هەڤپەیمان دكەم ئەوێن كو د شەڕێ داعشێدا هاریكاریا مە كری. هاریكاریا وان بەرز دنرخینین و بخێرهاتنا وان دكەین. بخێرهاتنا نێردێن دیپلۆماسی یێن ولاتێن بیانی دكەین ل هەولێرێ. هەمی لایەك ب خێر بێن، سەر چاڤا.
خۆشحالم كو ئەڤرۆ ل ڤێرەمە ل زاخۆ دگەل هەوەیێن ڕێزدار، داكو ئەم هەمی ژ دل و پێكڤە پیرۆزباهیێ ل ئێك ب ئێكی وان (٤٩٩) دەرچوویێن خولا (٢٧)ێ بنەڕەتی یا كۆلیژا سەربازی یا دو ل زاخۆ بكەین.
پیرۆزباهیێ ل هەوەیێن خۆشتڤی و دایكوباب و كەسوكارێن هەوە دكەم بۆ ڤێ سەركەفتنێ، تەمەندرێژ بن، سەركەفتی بن بۆ خزمەتكرنا ولاتێ خۆ. من دڤێت لێرە سەرەڕای پیرۆزباهیێ ل وە هەمیا، پیرۆزباهییەكا تایبەت ل ئەفسەر (ئیلداد ئەبریم یلدەخانی) بكەم، كو تاكە قوتابی و دەرچوویێ مەسیحییە دڤێ خولێدا.
هیڤیدارم خولێن داهاتی هژمارەكا زۆر مەسیحی، توركمان و هژمارەكا زۆر خوشك و برایێن ئێزدی ژی بەشدار بن. گەلەك دلخۆش بووم كو ل كۆلیژا سەربازی یا سێ ل قەلاچۆڵان من هژمارەكا دەرچوویێن ئافرەت دیتن. بەری نها ژی لێرە ئافرەت ل ڤان خولێن كو ل زاخۆ هاتینە كرن، دەرچووینە. هیڤیدارین د خولێن داهاتیدا، هژمارەكا زێدەتر و بەرچاڤتر ل ڤانە ببینین. خۆشحالم كو ئەڤرۆ دبینم دەرچوویێن ڤێ خولێ خەلكێ هەرچار پارێزگەهێن هەرێما كوردستانێ و دەرڤەی هەرێمێنە.
بەشدارییا خەلكێ هەمی دەڤەرا دڤا خولادا و پێكڤەبوونا وان د یەك جهدا، هاریكارییە بۆ یەكخستن و یەكبوونا هێزا پێشمەرگەیێ كوردستانێ. دەستخۆشییەكا تایبەت ل ڕاگرێ كۆلیژا سەربازی یا دو ل زاخۆ دكەم، هەروەسا دەستخۆشیێ ل هەمی وان مامۆستا و ڕاهێنەرێن سەربازی دكەم كو ب درێژاهییا ڤێ خولێ قوتابی فێری زانست و تەكنیكێن سەربازی كرینە و ڕوحا بلندا پێشمەرگانە فێری قوتابیا كرینە دڤێ خولێدا.
سوپاسییا كارێ بەردەوامێ وەزارەتا پێشمەرگەی دكەم بۆ سەركەفتنا ڤێ خولێ، هەروەسا سوپاسییا هاریكارییا وەزارەتا بەرگرییا عێراقێ دكەم. جهێ دلخۆشیێ یە كو كۆلیژا سەربازی یا دو ل زاخۆ، د ئاستەكێ هەرە بلندایە ل عێراقێ و ژ دەمێ دامەزراندنا وێ ل ساڵا ١٩٩٦ و تا نها (٥٦) خولێن بنەڕەتی و ئەفسەرا ژ ڤێ كۆلیژێ دەرچووینە.
دامەزراندن و پێشئێخستنا كارێ كۆلیژا سەربازییا زاخۆ، هەردەم ژ ڕۆژا دامەزراندنێڤە جهێ بایەخا تایبەتی یا سەرۆك بارزانی بوویە. ئەم ب ناڤێ خۆ و هەوە هەمیا، سپاسییا جەنابێ وی دكەین. هەروەسا دڤێ دەلیڤێدا (60) سالییا پێشمەرگاتیا سەرۆك بارزانی و خزمەتا جەنابێ وی بۆ دۆزا ڕەویا كوردستانێ، پیرۆز دنرخینین.
پێشمەرگەیێن قارەمان و خەلكێ خۆشتڤیێ كوردستانێ..
ئەڤرۆ ٢٦ی گوڵانێیە و بیرهاتنەكا پیرۆزە د دیرۆكا شۆڕەشدا، شۆڕشگێڕی و بەرخودانا كوردستانێیە. ٢٦ی گوڵانێ بیرئینانا خۆڕاگری و سەرهلدانەڤا خەباتا پێشمەرگایەتیێیە ل كوردستانێ د ڕۆژەكا گەلەك دژواردا. كەسێن كو وی دەمی گۆتینە دوژمنا، پێشمەرگە مایە و كوردستان دێ هەر مینیت، ئەڤرۆ پشتی ڤان هەمی سالا، دیسا ب ڕێز و پێزانینڤە بیرئانینا وان خەباتكەرا، وان دلسۆزا، وان پێشمەرگێن قەهرەڤان دكەین.
سڵاڤ ل هەمی وان قەهرەمانێن ڕۆژێن شۆڕەش و خەباتا پێشمەرگایەتیێ دەستپێكری. سڵاڤ ل گیانێ پاك و پیرۆزێ وان قەهرەمانان بیت گیانێ خۆ كریە فیدا، كریە قوربانی ژبۆ مانا كوردستانێ و نەهێلانا دیكتاتۆریەتێ و بدەسڤەئینانا ئازادیێ بۆ گەلێ كوردستانێ و هەمی عێراقێ. سڵاڤ ل بیرەوەرییا هەردوو شۆڕەشێن ٢٦ی گوڵانێ و شۆڕەشا نوی كو بۆ ئازادیێ و خەباتێ و بەرخودانێ و ڕزگاركرنا مللەتێ مە دەست پێكر و خەبات بۆ كر.
گەلەك خۆشحالم كو دڤێ دەلیڤێدا لێرەمە، ل زاخۆ، زاخۆیا خۆڕاگر، زاخۆیا شۆڕەشگێڕ. زاخۆ و زاخۆییا، ڕۆلەكێ زۆر كاریگەر و سەرەكی د شۆڕەشا گولانێدا گێڕا، شۆڕەشا گوڵانێ ژی ل ڤێ دەڤەرێ دەستپێك و بناغێ سەركەفتنێ دانا. زاخۆ ژبەركو ناڤەندەكا سەرەكییا خەباتا پێشمەرگەی بوویە، لەوما ئەڤ كۆلیژە ژی ل ڤێرێ هاتە دامەزراندن.
ئامادەبوویێن بەڕێز..
هێزا پێشمەرگەیێ كوردستانێ، هێزا پارێزەرا كوردستانێ یە و بەشەكە ژ سیستەمێ بەرگرییێ عێراقێ. لێ لسەردەمێ شەڕێ داعش وەك هێزەكا سەرەكییا بەرهنگاربوونا داعش، بوو بەشێك ژ هەڤپەیمانییەكا نێڤدەولەتی بۆ تێكشكاندن و ژناڤبرنا داعشێ و پاراستنا ئارامییا دەڤەرێ و ئازادیێ و ئارامیێ ل جیهانێ.
مخابن داعش هێشتا مایە و، هێرشێن وێ زێدە دبن ل هندەك دەڤەرا، بتایبەتی ژی ل دەڤەرێن ناكۆكی لسەر. ڕۆژانە ئەڤ هێرشێن داعش دبنە سەبەبێ شەهیدبوونا خەلكێ ڤان دەڤەرا و پێشمەرگە و حەشد و سەربازێن سوپایێ عێراقێ. دەڤەرێن ناكۆكی لسەر، بووینە بنگەهـ و كۆریدۆرێ تیرۆریستێن داعش و جهێ خۆڕێكخستنا وان، ئەڤە ژی گەفە و مەترسییەكا گەلەك مەزنە بۆ سەر هەرێما كوردستانێ و هەمی عێراقێ، هەروەسا مەترسییە بۆ سەر هەمی جیهانێ ژی.
زێدەبوونا هێرشێن داعشێ و گەفێن وێ یێن ڕۆژانە لسەر ژیانا گوند و شارۆچكەیێن دەڤەرێن ناكۆكی لسەر، ب دیتنا مە پێویستی ب پێكەڤە كاركرنەكا هەمەلایەنە هەیە. دڤێت ئەم دڕندەیی و مەترسییا داعشێ كێم نەبینین، چونكی داعشێ كۆمكوژیێن زۆر مەزن بەرامبەر گەلێ مە ئەنجام داینە و چەندین دەڤەر وێران كرینە و بوونە مەترسی بۆ عیراقێ و كوردستانێ و هەمی جیهانێ.
نوكە ژی داعش خودانا هەمان فكر و ئاراستەیا كوشتن و وێرانكرنێ یە. لەوما زێدە كاركرنا پێكڤە یا پێشمەرگە و سوپایێ عێراقێ و، دەستبكاربوونا بلەز و دەمودەست یا هەردوو لیوایێن هەڤبەشێن سوپا و پێشمەرگەی، زۆر پێویستە ل وان دەڤەرا.
دڤی باردۆخیدا دابینكرنا پێداویستیێن پێشمەرگەی، پێشخستنا مەشق و ڕاهێنانا پێشمەرگەی، پێویستییەكا زۆر گرنگە بۆ بەرهنگاربوونا داعش. پێشمەرگەی پێدڤی ب هەمی پێداویستی و تەكنەلۆژیا پێشكەفتی یا سەربازی هەیە.
پێشمەرگە هەتا نۆكە ب چەكێ گەلەك سادە، لێ ب فیداكارییەكا مەزن و خوینا خۆ قەهرەمانییەكا زۆر نیشاندایە و گەلەك داستانێن مەزن د بەرخودانێدا تۆمار كرینە. نۆكە پشتەڤانیكرنا پێشمەرگەی ژلایێ حكوومەتا فیدرالییا عێراقێ و هەڤپەیمانانڤە، زۆر پێویستە، نها گەلەك پێویستترە ژ جارا. داخوازێ ژ حكوومەتا فیدرالییا عێراقێ و هەڤپەیمانا دكەم پتر هاریكارییا پێشمەرگەی بكەن ب مەشق و ئامێر و چەكێن پێشكەفتی و ڕاهێنانێ.
ئامادەبوویێن خۆشتڤی و لایەنێن سیاسی یێن كوردستانێ..
ناڤودەنگ و ڕێزا پێشمەرگەی ئەڤرۆ ل جیهانێ ژ هەمی دەمەكی زێدەترە. بەشدارییا پێشمەرگەی د پاراستنا هەمی پێكهاتەیاندا ژ هەر دەمەكی دیارترە، كو ئەڤە ئەو خالە یا كو ئەم هەمی گاڤا پێ سەرفراز و سەربلندین. لێ مانا دەستێوەردانا حزبی د كاروبارێن پێشمەرگەیدا، ڕێگرە ل پێشكەفتنا هێزا پێشمەرگەیێ كوردستانێ.
هەروەسا هەبوونا دەستێوەردانا حزبی وەدكەت بەردەوام مەترسییا وێ چەندێ هەبیت كو پێشمەرگەی بكەنە بەشەك ژ ناكۆكیێن سیاسی یێن حزبان ل هەرێما كوردستانێ، ئەڤە ژی گەفەكا زۆر جددییە لسەر پرۆسەیا دیموكراسی و بڕێڤەبرن و یەكێتییا هەرێما كوردستانێ.
ژبەر ڤێ چەندێ جارەكا دی ل ڤێرێ وەك داخوازییەكا خەلكێ كوردستانێ، وەك پێویستییەكا نیشتمانی، وەك ئەركێ خۆ یێ یاسایی، داخوازێ ژ پارتی دیموكراتی كوردستان و یەكێتیی نیشتمانیی كوردستان دكەم دەستێوەردانا حزبی د كاروبارێن پێشمەرگەیدا ڕابگرن و بێی پەشێمانبوون و بێ دودلی، ڤێ دەستێوەردانێ ب دویماهی بینن.
هەتا نۆكە هەردوو هێزێن پشتەڤانی یێن (1) و (2)، هەروەسا (٢٢) لیوایێن هێزێن (70) و (80) كەفتینە سەر وەزارەتا پێشمەرگەی، ئەڤە پێنگاڤەكا گرنگە. بەلێ ئەڤە بەس نییە و دڤێت هەمی هێزا پێشمەرگەی ببیتە ئێك و هەڤدەم هەمی دەرگەهێن دەستێوەردانا حیزبی ژی بهێنە گرتن.
سەرۆكاتییا هەرێما كوردستانێ، وەك فەرماندەیا گشتی یا هێزا پێشمەرگەی، هەمی هەولا ددەت و ب تەمامی پشتەڤانیێ ل كارێ وەزارەتا پێشمەرگەی ژی دكەت بۆ یەكخستنا پێشمەرگەی. لێ ژبۆ ڤێ سەركەفتنێ، دڤێت دویماهیئینان ب دەستێوەردانا هەمی لایەكی، بتایبەتی پارتی و یەكێتیڤه هەبیت و ئەم ژڤێ قۆناغێ دەرباس ببین و هێزێن پێشمەرگێ كوردستانێ ببنە ئێك بۆ وێ سویندا وان خاری كو دێ هەرتم بەرەڤانیێ ل كوردستانییا و ل كوردستانێ كەن.
ئەڤە چەند ساڵە وەڵاتێن هەڤپەیمان پلان هەیە بۆ ئێكخستنا پێشمەرگەی و ب سپاسیڤە لسەر ڤێ چەندێ كاردكەن، ئەڤە دەرفەت و پشتەڤانییەكا زۆرا مەزنە بۆ پێشمەرگە و گەلێ كوردستانێ. خەلك داخوازا ئێكخستنا هێزا پێشمەرگەیێ كوردستانێ دكەت، نۆكە ئەم دشێین ڤێ پرۆسەیێ ب هاریكارییا هەڤپەیمانا سەربێخین. خەلكێ كوردستانێ داخوازا ئێكبوونا هێزا پێشمەرگەی دكەت، لەوما داخازێ ژ پەرلەمانێ كوردستانێ ژی دكەم وەك نوینەرێ خەلكی، ب هویری چاڤدێرییا پرۆسەیا ئێكبوونا هێزا پێشمەرگەی بكەت.
پێشمەرگە دەمێ دروستبووی، بۆ گەلێ كوردستانێ و بۆ پاراستنا كوردستانیا دروست بوو، نە بۆ حزب و پاراستنا حزبا. ئەڤە دەرفەتەكا زێڕینە كو هێزا پێشمەرگەی ب تەمامی ببیتە هێزەكا سەربەخۆ یا دویر ژ دەستێوەردانێ.
خەلكێ خۆشتڤیێ كوردستانێ..
ناكۆكیێن ناڤبەرا حزبا ل هەرێما كوردستانێ هوین ماندی كرینە، زیان گەهاندییە بازاڕ و كەسابەتا هەوە و ڕێ ڤەكرییە بۆ مەترسی و فشارێن زێدەتر لسەر هەرێما كوردستانێ. ئەركێ مەیە بەرامبەری هەوە وەك سەرۆكاتییا هەرێما كوردستانێ كو هەوڵا كۆمكرن و تفاقا ناڤبەرا حزبا بدەین لسەر پرسێن نیشتمانی.
هیڤیدارین د دەمەكێ نێزیكدا گفتوگۆ و ڕێككەفتنا هەمی حزبا ب كریار لسەر ئارمانج و پرسێن سیاسی یێن نیشتمانی ببینین. دەما كۆمبوونێن مە ل سلێمانیێ، مە ئامادەییەكا زۆر باش ژ هەمی لایەنا دیت بۆ پێكڤەڕوینشتن و نەهێلانا ناكۆكییا. نۆكە زەمینە یا گونجاو بۆ گفتوگۆ و ڕێككەفتنا هەیە.
دوهی كۆبوونەكا باش د ناڤبەرا یەكێتیی نیشتمانیی كوردستان و پارتی دیموكراتی كوردستاندا بڕێڤه چوو، ب پشتەڤانیا خودێ دڤی ماوەیدا دێ زنجیرەكا كۆمبوونێن دی بینن. ب هیڤیا هندێ كو بگەهینە ڕێككەفتنەكا باش و ئارامیێ و سەقامگیریێ و خۆشگوزەرانیێ بۆ مللەتێ خۆ دابین بكەین. گەلەك پێویستە تاك ب تاكێن گەلێ كوردستانێ ژی پشتەڤانییا ڤێ ئاراستەیێ بكەن و ئەز هەوە پشتڕاست دكەم كو هیچ كێشەیەك نینە ل هەرێما كوردستانێ كو ئەم نەشێین ب پێكڤەڕوینشتنێ چارەسەر بكەین.
ئاڵۆزی و نەسەقامگیری ل هەر دەڤەرەكا عێراقێ، كاریگەری لسەر ڕەوشا هەمی دەڤەرێت دی یێن عێراقێ هەیە. بەرژەوەندی و سەروەرییا مە وەك عێراقی ل هەمی دەڤەرا هەڤبەش و یەكە. ئەم هەمی و ئەڤ پێشمەرگەیێن ئەڤرۆ ژ ڤێ خولێ دەرچووین و سویند خواری، تەماشەی سەقامگیری و سەروەرییا كوردستانێ و عێراقێ ڤێكرا دكەین.
ناكۆكیێن ناڤبەرا لایەنێن سیاسی ل بەغدا كاریگەرییەكا خراب ل هەمی عێراقێ و هەرێما كوردستانێ ژی كرییە. ناكۆكیێن ناڤبەرا حزبا ل هەرێما كوردستانێ ژی كێشەیێن زێدەتر بۆ پرۆسەیا سیاسی ل عێراقێ چێكریە. هەمی هەوڵێن ڕێككەفتنا سیاسی ل بەغدا و هەولێرێ تەمامكەرێن ئێكن.
نەهێلانا ناكۆكیێن ناڤبەرا حزبا ل هەرێما كوردستانێ، بەشەكێ تەمامكەرە ژ نەهێلانا چەقبەستنا سیاسی یا ناڤبەرا لایەنێن سیاسیێن هەمی عێراقێ، لەوما دڤێت ئەم هەمی هاریكارێن ئێكودو بین ژبۆ دەربازكرنا ڤێ چەقبەستنا سیاسی.
گرانیێ، ئەڤرۆ ژیانا هەمی خەلكێ جیهانێ زەحمەت كرییە. هەبوونا ناكۆكیێن سیاسی و چەقبەستنا سیاسی ل عێراقێ، وەسا كرییە كو خەلكێ عێراقێ زۆرتر بكەڤیتە بن ڤی بارێ گران. لەوما پێویستە هەمی هێزێن عێراقی نەرمییەكا زێدەتر بەرامبەر ئێكودو نیشان بدەین، دا ڤەكرنەكا تەمام د پرۆسەیا سیاسییا عێراقێدا دروست ببیت.
ئەم هەمی عێراقینە و بەشەكین ژ عێراقێ، لەوما ژی دڤێت ئەم هەمی ب ڤێ ڕوحێ بەرەف چارەسەرییا كێشەیان بچین ل عێراقێ. دڤێت ئەم هەمی ڤێكڕا ڕوینین و چارەسەرا هەڤپشك ڤەبینین و شكاندن و ئێكودوقەبوونەكرن دڤێت بدویماهی بێت.
ل ڤێرێ من دڤێت د هەمان دەمێدا داخوازێ ژ حكوومەتا فیدرالییا عێراقێ و هەمی دەسەڵات و دامەزراوەیێن فیدرالی ل عیراقێ كو بكەم، كو ب چاڤێ تەمامكەر و هەڤبەش بەرێ خۆ بدەنە هەرێما كوردستانێ بكەن. چونكی ئەم هەمی ئێكین و، سەركەفتن و شكەستنێن مە ژی هەڤبەشن.
پاراستن و بەرژەوەندی و پێكڤەژیانا مە ل هەمی دەڤەرێن عیراقێ وەك ئێكە و ئەركێ حكوومەت و دامەزراوەیێن فیدرالی یێن عێراقێ یە ب پلەیا ئێكەم. خەلكێ عێراقێ پێویستی ب ئارامی و پێشكەفتنێ یە و ب هیچ شێوەیەكی حەژ كێشەیێن زێدەتر ناكەت. ژبەرهندێ چێنابیت بەغدا باوەریا وێ ئەو بیت كو بێدەسهەلاتكرنا هەرێما كوردستانێ كردارەكێ باشە.
ئەز لێرە داخوازێ ژ بەغدا دكەم، ئەگەر ب جددی بەغدا هەرێما كوردستانێ وەكی بەشەك ژ عیراقێ دبینیت، ئەگەر بەغدا هەڤوەلاتیێن هەرێما كوردستانێ وەكی بەشەك ژ هەڤوەلاتیێن عێراقێ دبینیت، دڤێت ب زویترین دەم كێشەیێن كو دناڤبەرا هەرێما كوردستانێ و بەغدادا هەنه، چارەسەر بكەت. نابیت و دروست نیە هەڤوەلاتیێن هەرێما كوردستانێ وەكی بەشەك ژ عێراقێ هەر هەیڤ د دلەڕاوكێدا بن كا ئایا بودجە دێ ژ عیراقێ بۆ هێت یان نە؟!
ئاخفتنا من بۆ دەسەلاتدارێت عێراقێ ئەوە ڤێ مەسەلێ بدویماهی بینن. ئەگەر وە دڤێت و هوین دبینن هەڤوەلاتی یێن هەرێما كوردستانێ بەشەكن ژ عێراقێ، دڤێت دویماهیێ ب ڤێ فشارێ بینن یا كو ڤێ گاڤێ هند ل بەغدا تێتە سەر هەرێما كوردستانێ. ئەز باوەر دكەم مە ڤێكڕا دەرفەتا هەی كو هەمی ئاریشە و كێشەیان ل سەر مێزا گفتوگۆیا دگەل بەغدا چارەسەر بكەین. مە جددییەت دڤێت، حكوومەتا هەرێما كوردستانێ یا جددییە ڤا ئێرێشا ل سەر مێزا گفتوگۆیێ و ل سەر بنگەهێ دەستوورێ عێراقێ چارەسەر بكەت.
حەژێكرنا باژێڕێن عیراقێ، حەژێكرنە بۆ هەرێما كوردستانێ. خەلكێ مویسل، بەغدا، بەسرا، ئەنبار، كەركووك، هەولێرێ و سلێمانیێ، ئێكودو دڤێت. خەلكی چ ئارێشە دگەل ئێكودو نینە. خەلكی پێنەخۆشە و حەز ناكەن ئەڤە یا بەردەوام بیت. هیڤیا من ئەوە دویماهیێ ب ڤێ مەسەلێ بینن و دیسا ب زویترین دەم كێشە و ئارێشەیێن ناڤبەرا هەرێما كوردستانێ و بەغدا ب دیالۆگ و ل سەر مێزا گفتوگۆیێ چارەسەر ببن.
جارەكا دی پیرۆزباهیێ ل هەوە هەمیا دكەم، هیڤیا من ئەوە سەركەفتی بن بۆ خزمەتا كوردستانییا، تەمەندرێژ بن، وەفادار بن بۆ وێ سویندا كو وە خواری بۆ بەڕەڤانیێ ل خاكا پیرۆزا كوردستانێ و هوین هەمی لایەك ب خێر بێن سەر چاڤا.
زۆر سپاس.
نرخی بەرمیلێك نەوتی خاوی برێنت گەیشتە 114 دۆلار و 45 سەنت
نرخی بەرمیلێك نەوتی خاوی برێنت بە 114 دۆلارو 45 سەنت مامەڵەی پێوەكرا.
ئەمڕۆ پێنجشەممە 26 -5-2022 نرخی بەرمیلێك نەوتی خاوی برێنت لەكاتژمێر 09:08 لەبازاڕەكاندا بە114 دۆلارو 45 سەنت فرۆشرا.
هاوكات نرخی بەرمیلێك نەوتی خاوی تێكساس بە 110 دۆلار و 74 مامەڵەی پێوەكرا.
لە دوێنێ چوارشەممەوە نرخەكانی نەوتی لە بازاڕدا دەستییان بە بەرزبوونەوە كردووە.
ئەمڕۆ 27ـەمین رێورەسمی خولی دەرچووانی ئەكادیمیای سەربازی لە زاخۆ بەرێوە دەچێت
ئەمڕۆ پێنج شەممە 26-5-2022 بیست و حەوتەمین رێورەسمی خولی دەرچووانی ئەكادیمیای سەربازی لە زاخۆ بەرێوە دەچێت .
وابڕیارە بەرپرسانی باڵای هەرێمی كوردستان بەشداری لەرێورەسمەكەدا بكات.
کۆمێنت (0)
تا ئێستا هیچ کۆمێنتێک نەکراوە.