بڕیاری دابینکردنی نەوت پێش ھاتنی وەرزی زستان بۆ قوتابخانەکان درا

سەرۆکی دیوانی ئەنجوومەنی وەزیران لەمیانی کۆبوونەوەیەکی لەگەڵ وەزیری پەروەردەی هەرێمی کوردستان ئاماژەی بە دابینکردنی نەوت پێش هاتنی وەرزی زستان بۆ قوتابخانەکان درا.

فەرمانگەی میدیا و زانیاری ڕایگەیاند: د. ئومێد سەباح سەرۆکی دیوانی ئەنجوومەنی وەزیران ئەمڕۆ چوارشەممە 1ـی 6ـی2022 سەردانی وەزارەتی پەروەردەی حکوومەتی ھەرێمی کوردستانی کرد، لەلایەن ئالان حەمەسەعید ساڵح ، وەزیری پەروەردە و بەڕێوەبەرە گشتییەکانی وەزارەتی ناوبراو پێشوازی لێکرا.

ڕاشیگەیاند: لە سەرەتای کۆبوونەوەکەدا وەزیری پەروەردە باسی لە چاکسازییەکانی نێو وەزارەتەکەی کرد، ھەروەھا باسی لە سیستەمی E-parwarda کرد کە بووەتە ھۆی کەمبوونەوەی ڕۆتین لە دامودەزگەکانی حکوومەتی ھەرێمی کوردستان و پێویستییەکانی وەزارەتەکەی و کێشە گیروگرفتەکانی نێو وەزارەتەکەیانی خستەڕوو.

ئەوەشی خستەڕوو کە "پاشان سەرۆکی دیوانی ئەنجوومەنی وەزیران بە بایەخەوە باسی گرنگی وەزارەتەکە و کەرتەکەی کرد، ئاماژەی بە ھەماھەنگی زیاتری نێوان سەرۆکایەتی دیوانی ئەنجوومەنی وەزیران و وەزارەتی پەروەردە کرد ، داواشی لە بەڕێوەبەرە گشتییەکانی وەزارەتی پەروەردە کرد کە تەواوی دەسەڵاتی خۆیان لە چوارچێوەی ڕێنماییە بەرکارەکان بەکاربھێنن لە پێناو بنبڕکردنی ڕۆتین و خێراترکردنی مامەڵەی ھاووڵاتی و فەرمانبەر و مامۆستایان لە دامودەزگەکاندا."

هەروەها ڕایگەیاند: ھەر لە کۆبوونەوەکە ھەڵوەستە لەسەر کارەکانی ڕابردووی وەزارەتی پەروەردە و دانانی پلانێک بۆ داھاتوو کرا. ئامادەیی و پاڵپشتی بۆ پرسی پڕۆگرامی خوێندن و بەھەند وەرگرتنی کێشە و گرفتەکانی بەردەمی بە گرنگ زانرا، گرنگیدانی تەواو بە پرسی ئەزموونەکان و پرسی سەرپەرشتیارانی پەروەردە و ئاگاداربوون لە گرفتەکانیان و چارەسەکردنییان و باس لە ھەڵسەنگاندنی کاریگەرییەکانی ڤایرۆسی کۆڕۆنا و دانانی ڕێگەچارەیەک بۆ کاریگەرییەکانی کران.

ڕاشیگەیاند: لەبەرچاوگرتنی ژیانی پێکەوەژیانی ھەمیشەیی ئاشتیانەی ھەرێمی کوردستان لە ئاستی پەروەردەدا و ھەر لەو ڕوانگەیەوە تیشک خرایە سەر خوێندنی تورکمانی و سریانی و گیروگرفتەکانیان و بەچارەسەر گەیاندنی گرفتەکانییان و پرسی قوتابخانە سووریەکان و بەھاناوەچوونیان و باسکردنی ڕۆڵی ئەم بەھەناوەچوونەی لە ئاستی پەروەردە و بە بایەخ سەیرکردنی ئەم پرسە لە ئاستی نێودەوڵەتی بەرز نرخێنرا.

ئاشکراشی کرد کە هەر لە کۆبوونەوەکە سەرۆکی دیوانی ئەنجوومەنی وەزیران ئاماژەی بە دابینکردنی سووتەمەنی(نەوت) بۆ قوتابخانەکان پێش ھاتنی وەرزی زستان دا و پێداچوونەوە بە ڕێنمایی ئەزموونەکان و دانانی میکانیزم و ڕێنمایی نوێ و باشتر کە بگونجێت لەگەڵ ئێستای پرۆسەی خوێندن، دروستکردنی تیمێکی لە سەرۆکایەتی دیوانی ئەنجوومەنی وەزیران و وەزارەتی پەروەردە بۆ لە نزیکەوە ئاگاداربوون لە رەوشی پەروەردە و چارەسەرکردنی کێشە و گیروگرفتەکان بە پێویست زانرا.