به‌یانیى ئه‌مڕۆ پێنجشه‌ممه 2022/6/30 نێچیرڤان بارزانى، سه‌رۆكى هه‌رێمى كوردستان، پێشوازى له مارك برایسۆن ریچاردسۆن باڵیۆزى به‌ریتانیا له عیراق و شاندێكى یاوه‌رى كرد.
له كۆبوونه‌وه‌یه‌كدا دوایین پێشهاته‌كانى دۆخى عیراق و ته‌حه‌دییه‌كانى به‌رده‌م پرۆسه‌ى سیاسى، كێشه‌كانى هه‌ولێر ـ به‌غدا، دۆخى ناوخۆ و هه‌ڵبژاردنه‌كانى داهاتووى هه‌رێمى كوردستان، پرۆسه‌ى چاكسازى له وه‌زاره‌تى پێشمه‌رگه و یه‌كخستنه‌وه‌ى هێزه‌كانى پێشمه‌رگه و بره‌ودان به په‌یوه‌ندییه‌كانى به‌ریتانیا له‌گه‌ڵ عیراق و هه‌رێمى كوردستان، تاوتوێ كران.
هه‌ردوولا كۆك بوون له‌سه‌ر گرنگیى گه‌یشتنى هێز و لایه‌نه عیراقییه‌كان به لێكگه‌یشتن بۆ تێپه‌ڕاندنى سه‌ختییه‌كانى به‌رده‌م پرۆسه‌ى سیاسى و پێویستیى پاراستنى سه‌قامگیریى ئه‌منى و سیاسى له وڵات، هه‌روه‌ها جه‌ختیان له پێویستیى باشتركردنى خزمه‌تگوزارییه‌كان له وڵات كرده‌وه.
له‌باره‌ى كێشه‌كانى هه‌ولێر ـ به‌غداوه، نێچیرڤان بارزانى دووپاتى كرده‌وه كه چاره‌سه‌ركردنى كێشه‌كانى نێوان حكوومه‌تى هه‌رێمى كوردستان و حكوومه‌تى فیدراڵى عیراق، كلیلى ئارامى و چاره‌سه‌رى كێشه‌كانى عیراقه و ئاڵۆزكردنى كێشه‌كان له به‌رژه‌وه‌ندیى هیچ لایه‌نێكدا نییه و كه‌س تیایدا براوه نابێت.
گرنگیى یه‌كڕیزیى لایه‌نه كوردستانییه‌كان له به‌غدا، هاریكارى و هه‌ماهه‌نگى له بوارى ڕووبه‌ڕووبوونه‌وه‌ى تاوان و ماده هۆشبه‌ره‌كاندا، پرسى كۆچ و كۆچبه‌ران و پێشهاته‌كانى ناوچه‌كه به‌گشتى، ته‌وه‌رێكى دیكه‌ى كۆبوونه‌كه بوو.
کۆمێنت (0)
تا ئێستا هیچ کۆمێنتێک نەکراوە.