لە پارێزگای هەولێر هەڵمەتی نەهێشتنی چەكی بێ مۆڵەت دەستیپێكرد 

ئومێد خۆشناو، پارێزگاری هەولێر لە كۆنگرەیكی رۆژنامەوانیدا رایگەیاند: دوای ئەوەی ئەمڕۆ بەیانی مەسرور بارزانی، سەرۆكی حكومەتی هەرێمی كوردستان وەزارەتی ناوخۆی راسپارد بۆ ئەوەی كە هەرچی شوێنی چەك فرۆشتن هەیە لە هەرێمی كوردستان دابخرێن و هەڵمەتی دەست بەسەراگرتنی چەكی بێ مۆڵەت دەست پێبكات.
هەروەها گوتی: هەر ئەمڕۆ ئێمە وەكو لیژنەی ئەمنی پارێزگاری هەولێر دوای گفتوگۆكردن لەگەڵ وەزیری ناوخۆ و بۆ جێبەجێكردنی ئەو فەرمانەی سەرۆكی حكومەت چەند بریارێكمان داوەو لە ئێستادا ئەو بڕیارانانە دەكەونە بواری جێبەجێكردنەوە كە بریتییە لە: 
یەكەم: داخستنی ئەو شوێنانەی چەكی لێ دەفرۆشرێن.
دووەم: ئەو كەسەی پابەند نەبێت بەو بڕیارە رووبەرووی ئیجرائاتی یاسایی دەبێتەوە.
سێیەم: هێزەكانی ئاسایش و پۆلیس بەهەموو پێكهاتەكانییەوە ،زێرەڤانی، پێشمەرگە راسپێردران بۆ دروستكردنی هێزی هاوبەش و دانانی بازگە لەسەر رێگاكان و دەست بەسەراگرتنی چەكی بێ مۆڵەت.
چوارەم: هەموو پرسگەی فەرمانگەكانی حكومەت بەشێك دەبن لەهەڵمەتەكە و ئەوانیش لەوكاتەی ئەو هاووڵاتیانەی بەچەكی بێ مۆڵەت سەردانیان دەكەن، دەتوانن هەر لەوكاتەدا ئیجرائاتیان لەگەڵدا بكەن و دەست بەسەر چەكەكانیاندا بگرن.
پێنجەم:ئاسایشی بازگەكان راسپێردراون لە ئەمڕۆوە هەرچی ئیجرائاتی ئەمنی ئاسایی خۆیان هەیە بیكەن و بەشێك دەبن لە هەڵمەتی دەست بەسەراگرتنی چەكی بێ مۆڵەت.
شەشەم: ئەو هێزە هاوبەشەی كە لەنێوان هەموو هێزەكان پێكهاتووە، بەشەو بێت یان بەرۆژ ،بازگە بۆ ئیجرائات و كاری پێویست دادەنێن.
هەروەها پارێزگاری گوتیشی: بڕیارەكان لەكاتژمێر 2ی پاش ئەمڕۆ كەوتۆتە بواری جێبەجێكردنەوەو داواشی لە هاووڵاتیان كرد كە ئەوانەی چەكی بێ مۆڵەتیان هەیە با رادەستی حكومەتی بكەنەوە.