به‌ڕێوه‌به‌رایه‌تی گشتیی ته‌ندروستی كۆیه ئه‌مڕۆ هه‌ینی به فه‌رمی تۆماركردنی 7 حاڵه‌تی كۆلێرای له قه‌زاكه‌یان ڕاگه‌یاند:
به‌ڕێوه‌به‌رایه‌تی ته‌ندروستی كۆیه ڕایگه‌یاند: دوای زیادبوونی ئامارەکانی داخڵبوونی نەخۆش لە نەخۆشانەکانی قه‌زای كۆیه، وەرگرتنی سیمپڵ لە نەخۆشەکان بۆ پشکنینی نەخۆشی کۆلێرا ئه‌نجامدرا و ڕه‌وانه‌ی تاقیگەی سەرەکی هەولێر كرا.
ڕاشیگه‌یاند: دوای گه‌ڕانه‌وه‌ی ئه‌نجامه‌كان ده‌ركه‌وت كه 7 له پشكنینه‌كان پۆزه‌تیڤن واته هه‌ڵگری ڤایرۆسی كۆلێران.
هه‌روه‌ها ڕایگه‌یاند: ئه‌و 7 كه‌سه‌ی تووشی كۆلێرا بوون، 5 كه‌سیان خه‌ڵكی ته‌قته‌قن و 2 حاڵه‌ته‌كه‌ی تریش خه‌ڵكی ناو سه‌نته‌ری قه‌زای كۆیه‌ن.
به‌ڕێوه‌به‌رایه‌تی گشتیی ته‌ندروستی كۆیه داوای له هاووڵاتییان كرد پابه‌ندی ڕێنماییه خۆپارێزی و ته‌ندروستییه‌كان بن كه خۆی له پاكوخاوێنی كه‌سی و دڵنیابوونه له به‌كارهێنانی ئاوی پاكی خواردنه‌وه و خۆراك ده‌بینێته‌وه.
هه‌روه‌ها داواشی كرد له كاتی ده‌ركه‌وتنی هه‌ر نیشانه‌یه‌كی سكچوون، هاووڵاتییان به زووترین كات سه‌ردانی بنكه‌كانی ته‌ندروستی بكه‌ن بۆ وه‌رگرتنی چاره‌سه‌رییه پزیشكییه‌كان و سه‌لامه‌تییان.
کۆمێنت (0)
تا ئێستا هیچ کۆمێنتێک نەکراوە.