پلەكانی گەرما لە بەریتانیا دەگاتە 40 پلەی سەدی

پێشبینی دەكرێت ئەمڕۆ سێشەممە پلەكانی گەرما لە بەریتانیا بۆ یەكەمجار لە مێژووی ئەو وڵاتەدا بگاتە 40 پلەی سەدی، ئەمەش لەكاتێكدایە شەپۆلێكی گەرما رووی لە رۆژئاوای ئەوروپا دەكات و بەهۆیەوە ئاگر لە دارستانەكان بە تایبەت لە باشووری رۆژئاوای فەرەنسا روودەدات.
ئەمە دووەم شەپۆلی گەرمایە كە لە ماوەی مانگێكدا ڕوو لە ئەوروپا بكات، لەگەڵ ئاگركەوتنەوە توندوتیژەكانی نیمچە دوورگەی ئیبەری و فەرەنسا، بەپێی زانایان، بڵاوبوونەوەی شەپۆلەكانی گەرما دەرئەنجامی ڕاستەوخۆی گەرمبوونی كەشوهەوایە.
ئەو شەپۆلە گەرمییە توندەی كە هێشتا فەرەنسا بەدەستیەوە دەناڵێنێت ، گەیشتۆتە بەریتانیا و پێشبینی دەكرێت پلەی گەرمی بە شێوەیەكی بێ وێنە لە ئاستی 40 پلەی سەدی تێپەڕێنێت. ئاستی پێوانەیی پێشووتر لە بەریتانیا دەگەڕێتەوە بۆ 25ی تەمموزی 2019 و گەیشتووەتە 38.7 پلەی سەدی.
ڕۆژی دووشەممە لە ڕۆژهەڵاتی ئینگلتەرا پلەی گەرمی 38.1 پلەی سەدی تۆماركردووە كە بەرزترین پلەی گەرمای ئەمساڵە و سێیەم پلەیە لە بەریتانیا تۆماركراوە. پلەكانی گەرما لە وێڵز 37.1 پلەی سیلیزی تۆماركرد و لە لەندەن پلەی گەرما گەیشتە 37.5 پلە.