عێراق بەرپرسی کاروباری وڵاتەکەی لە ئەنقەرە بانگ کردەوە

ئەمڕۆ شەممە 23ـی 07ـی 2022 وەزارەتی دەرەوەی عێراق، بەرپرسی کاروباری وڵاتەکەی لە ئەنقەرە بانگ کردەوە بۆ بەغدا.

ئەحمەد سەحاف گوتەبێژی وەزارەتی دەرەوەی عێراق ڕایگەیاند: بەرپرسی کاروباری عێراقمان لە ئەنقەرە بانگ کردەوە بۆ بەغدا و دووپاتیشی کردەوە کە هیچ ڕێککەوتنێکی ئەمنی و سەربازییان لەگەڵ تورکیا نییە.

ڕۆژی چوارشەممە 20ـی 07ـی 2022 ھاوینەھەواری پەرەخ لە سنووری زاخۆ تۆپباران کرا و بەھۆیەوە 9 کەس گیانی لەدەست دا و 23 کەسی دیکەش برینداربوون کە سەرجەمیان گەشتیاری عەرەبن، ئەمەش کاردانەوەی زۆری بەدوای خۆی ھێنا و تورکیا تۆمەتبار کرا بە ئەنجامدانی ھێرشەکە، لەبەرامبەردا تورکیا تۆمەتەکانی ڕەت کردەوە.

هاوکات عێراق سكاڵای دژی تورکیا بۆ ئەنجوومەنی ئاسایش ناردووە و داوای لێ كردووە دانیشتنێكی بەپەلە بۆ تاوتوێكردنی "دەستدرێژییەكانی توركیا" ئەنجام بدرێت.