وەزیری بازرگانی و پیشەسازی حکوومەتی هەرێمی کوردستان رایگەیاند، سەرەتای هەفتەی داهاتوو بڕی 100 ملیار دینار پارەی گەنمی جوتیاران بۆ ساڵەکانی 2014، 2015، 2016 دابەش دەکرێت و لە ماوەی 10 رۆژی داهاتووشدا 208 ملیاری دیکە دەگاتە دەستمان، به‌مه‌ش تەواوی پارەکە کە ده‌كاته 308 ملیار دینار دابەش دەکرێت.
کەمال موسلیم وەزیری بازرگانی لەبارەی پارەی گەنمی ئەمساڵ رایگەیاند: لە ئەمساڵدا 103 ملیار و 159 ملیۆن دینار پارەی گەنمی جوتیاران دابەشکراوە و 160 ملیاری دیکەش هەفتەی داهاتوو دابەش دەکرێت.
سەبارەت بە بڕی گەنمی وەرگیراوی ئەمساڵ وه‌زیر گوتی: تا ئێستا 311 هەزار تۆن گەنم وەرگیراوە، بەشی پێنج مانگی خۆمان دەکات کە دەبووایە زیاتر لە 700 هەزار تۆن گەنم وەربگرین.
لەبارەی کوالیتی گەنمەوە، وەزیری بارزگانی و پیشەسازی راگەیاند: ئەو بابەتە پەیوەندی بە وەزارەتی کشتوکاڵەوە هەیە، بەڵام کوالێتی گەنمی ئەمساڵ بە گشتی خراپ نییە.
سه‌باره‌ت به نرخی پێداویستی خۆراک، کەمال موسلیم ئاشکرای کرد: لە قۆناغی یەکەمی رووبەرووبوونەوەی بەرزبوونەوەی نرخی پێداویستی خۆراکی ڕەسم و باجی گومرگی لەسەر 10 پێداویستی خۆراکی بۆ ماوەی دوو مانگ هەڵگیراوه و دواتر ئەو ماوەیە درێژتر کرایەوە.
کۆمێنت (0)
تا ئێستا هیچ کۆمێنتێک نەکراوە.