ئەڵمانیا .. بەهۆی بەرزبوونەوەی پلەكانی گەرما رووباری راین وشك دەبێت

بەهۆی وشكەساڵییەوە لە وەرزی هاویندا، ئاستی ئاو لە رووباری راین كە یەكێكە لە رێگا بازرگانییە هەرە گرنگەكانی ئەڵمانیا بە رێژەیەكی زۆر بەرز كەمبووەتەوە.
پسپۆڕان ئاماژە بەوە دەدەن كە وشكەساڵی درێژخایەن و بەرزبوونەوەی لە رادەبەدەری پلەكانی گەرما كاریگەرترین هۆكاری دابەزینی ئاستی ئاوە لە رووباری راین هاوشێوەی رووبارەكانی دیكە و زیاتر دابەزینی ئاستی ئاو بە واتای بەكارنەهێنانی ئەو كەشتییانە دێت كە باری قورسیان پێیە لە رووبارەكە و هۆشداریش لەوە دەدرێت كە ئەمە كاریگەری نەرێنی دەكاتە سەر ئابووری.
لەوبارەیەوە باستیان كلەین، پسپۆڕ لە ئەنیستیتوی فیدڕاڵی بۆ ئاو، رایگەیاندووە كە دابەزینی ئاستی ئاوی رووبارەكە بەردەوام دەبێت و گوتی: "پێشبینی دەكرێت هەفتەی داهاتوو كەمێك باران ببارێت، بەڵام ئەمە نابێتە هۆی بەرزبوونەوەی ئاستی ئاو".
فەرمانگەی دەریاوانی و رێگا ئاوییەكانی فیدڕاڵ رایگەیاندووە كە تاكو كۆتایی هەفتە چاوەڕێ دەكرێت ئاستی ئاو لە راینی ناوەڕاست 10 بۆ 15 سانتیمەتر كەم بكات.
رووباری راین یەكێكە لە رێگا ئاوییە هەرە قەرەباڵغەكانی جیهان و لە رێگای ئەم رووبارەوە كەشتیی گواستنەوەی كەلوپەل و شتومەك دێن و دەڕۆن.