سەرۆکی هەرێمی کوردستان ئەمڕۆ سێشەممە 23ـی 08ـی 2022 ڕایگەیاند، عێراق چیتر به‌رگه‌ی قه‌یرانه‌كان ناگرێت و درێژه‌كێشانی ئاڵۆزییه‌كان زیان به ته‌واوی گه‌ل ده‌گه‌یه‌نێ.
نێچیرڤان بارزانی، سەرۆکی هەرێمی کوردستان لە پەیامێکدا ڕایگەیاند: به‌وپه‌ڕى په‌رۆشى و نيگه‌رانييه‌وه له پێشهاته سياسييه‌كانى عێراق ده‌ڕوانين كه تا دێت به ئاراسته‌ى په‌رته‌وازه‌يى و قووڵتربوونه‌وه‌ى زياترى قه‌يرانه‌كان و دووركه‌وتنه‌وه‌ى ئاسۆى چاره‌سه‌ردا ده‌ڕۆن. دۆخه‌كه وا خه‌ريكه داهاتووى وڵات و ئاشتيى كۆمه‌ڵايه‌تى ده‌خاته مه‌ترسييه‌كى جددييه‌وه و كۆى پڕۆسه‌ى سياسى و حوكمڕانى و دامه‌زراوه‌كان په‌ك ده‌خات.
ڕاشیگەیاند: خۆپيشاندانى مه‌ده‌نيى ئاشتيانه، مافێكى ڕه‌وا و ده‌ستووريى پارێزرا‌وه، به‌ڵام په‌كخستنى دامه‌زراوه‌ى دادوه‌رى دۆخه‌كه ئاڵۆزتر ده‌كات، بۆيه داوا له هه‌موو لايه‌نه‌كان و له خۆپيشانده‌ران ده‌كه‌ين دامه‌زراوه‌كان و ئاشتيى كۆمه‌ڵايه‌تى بپارێزن و له ڕه‌وتى ئاشتييانه و مه‌ده‌نى دوور نه‌كه‌ونه‌وه. وڵات چيتر به‌رگه‌ى ئه‌م هه‌موو قه‌يرانه سه‌خت و بارگرژييه ناگرێت و درێژه‌كێشانى زياترى ئاڵۆزى، دواجار به زيانى ته‌واوى گه‌لى عێراق ته‌واو ده‌بێت.
سەرۆکی هەرێمی کوردستان ئاماژەی بەوەش دا کە "ئێمه له هه‌رێمى كوردستان جارێكى ديكه جه‌خت له‌وه ده‌كه‌ينه‌وه كه وه‌ك هه‌ميشه به‌شێكين له چاره‌سه‌ر و هه‌موو هاوكارييه‌ك ده‌كه‌ين بۆ لێكگه‌يشتن و پێكهاتنى لايه‌نه عێراقييه‌كان. وڵات پێويستى به گفتوگۆيه‌كى جدديى نيشتمانى و به‌رپرسيارانه‌ى لايه‌نه سياسييه‌كانه بۆ دۆزينه‌وه‌ى چاره‌سه‌ر له‌سه‌ر بنه‌ماى ده‌ستوور، هه‌ر ئه‌وه‌ش تاكه ڕێگه‌ى دروسته بۆ ده‌رچوون له قه‌يران و بنبه‌ستى سياسى و گه‌ياندنى وڵات به كه‌نارى ئارامى."
کۆمێنت (0)
تا ئێستا هیچ کۆمێنتێک نەکراوە.