سه‌رۆك وه‌زیرانی عێراق داوای ڕێبه‌ری ڕه‌وتی سه‌در كرد ده‌ستبه‌جێ داوا له خۆپیشانده‌ران بكات له كۆشكی سه‌رۆك كۆمار بكشێنه‌وه و دۆخی ناوچه‌ی سه‌وزی به‌غدا ئاسایی بكه‌نه‌وه.
مستەفا كازمی سەرۆك وەزیرانی عێراق ڕایگه‌یاند هێرشكردنی خۆپیشانده‌ران بۆ سه‌ر داموده‌زگاكانی حكوومه‌ت دوورن له چوارچێوه‌ی یاسایی و سه‌ركۆنه‌یان ده‌كه‌ین، هه‌روه‌ها داواش له موقته‌دا سه‌در ڕیبه‌ری ڕه‌وتی سه‌در ده‌كه‌ین كه وه‌ك هه‌میشه پشتگیری له ده‌وڵه‌ت كردووه، ڕێزی له هێزه ئه‌منییه‌كان بگرێ هاوكارییان بكات و داوا له خۆپیشانده‌ران بكات له داموده‌زگاكانی حكوومه‌ت بكشێنه‌وه.
روونیشی كرده‌وه كه به‌رده‌وامبوونی ناكۆكییه سیاسییه‌كان زیان به ته‌واوی دامه‌زراوه‌كانی ده‌وڵه‌ت ده‌گه‌یه‌نێت، هه‌روه‌ها خزمه‌ت به تواناكانی گه‌لی عێراق و ئاوات و ئاینده و یه‌كپارچه‌یی خاكه‌كه‌یان ناكات.
مسته‌فا كازمی سه‌رۆك وه‌زیرانی عێراق هه‌روه‌ها داوای له هه‌موولایه‌ك كرد دان به‌خۆدا بگرن و خۆپیشانده‌رانیش هه‌ر ئێستا و ده‌ستبه‌جێ له ناوچه‌ی سه‌وز بكشێنه‌وه و پابه‌ندی ڕێنماییه‌كانی هێزه ئه‌منییه‌كان بن كه به‌رپرسیارن له پاراستنی داموده‌زگا فه‌رمییه‌كان و گیانی هاووڵاتییان.
دوای نیوه‌ڕۆی ئه‌مڕۆ دووشه‌م خۆپیشانده‌ران و لایه‌نگرانی ڕه‌وتی سه‌در له ناوچه‌ی سه‌وز هێرشیان كرده سه‌ر كۆشكی سه‌لامی سه‌رۆك كۆمار و ئه‌نجوومه‌نی وه‌زیران و به‌شێكی زۆری باڵه‌خانه‌كانی ناوچه‌ی سه‌وزیان كۆنتڕۆڵ كرد، ئه‌مه دوای ئه‌وه‌ی كه موقته‌دا سه‌در ڕێبه‌ری ڕه‌وته‌كه‌یان بڕیاری وازهێنانی هه‌میشه‌یی له كاری سیاسی ڕاگه‌یاند.
کۆمێنت (0)
تا ئێستا هیچ کۆمێنتێک نەکراوە.