باڵیۆزخانه‌ی ئه‌مه‌ریكا له عێراق هۆشداری دا له دۆخی ناسه‌قامگیری ئێستای عێراق و جه‌ختی كرده‌وه كه توندوتیژییه‌كانی ئه‌مڕۆی شاری به‌غدا و پارێزگاكانی عێراق جێگه‌ی نیگه‌رانی ئه‌مه‌ریكان.
باڵیۆزخانه‌ی ئه‌مه‌ریكا له عێراق به‌یاننامه‌یه‌كی له‌سه‌ر بارودۆخی ئێستای عێراق بڵاو كرده‌وه و ڕایگه‌یاند: نائارامییه‌كانی ئه‌مڕۆی عێراق جێگه‌ی نیگه‌رانین، چونكه ڕێگه له دادموده‌زگاكانی حكوومه‌ت ده‌گیرێت كاری خزمه‌تگوزاری خۆیان پێشكه‌ش بكه‌ن.
ڕاشیگه‌یاند: ئه‌مه‌ریكا نیگه‌رانه له په‌ره‌سه‌ندنی گرژییه‌كان و داوا له هه‌موو لایه‌نه‌كان ده‌كات ئارامبن و خۆیان به دوور بگرن له هه‌ر كارێك كه توندوتیژی لێ بكه‌وێته‌وه.
هه‌روه‌ها ڕایگه‌یاند: نابێت ئاسایش و سه‌قامگیری و سه‌روه‌ری عێراق بخرێته مه‌ترسییه‌وه، ئێستاش كاتی ئه‌وه‌یه ده‌ست به گفتوگۆكان بكرێته‌وه بۆ چاره‌سه‌كردنی ناكۆكییه‌كان و نه‌ك ڕووبه‌ڕووبوونه‌وه‌ی یه‌كتر.
باڵیۆزخانه‌ی ئه‌مه‌ریكا له عێراق ئاماژه‌ی به‌وه‌ش دا كه ده‌ربڕینی ناڕه‌زایه‌تی مافێكی گشتییه و بنه‌مای دیموكراسییه، به‌ڵام له هه‌مانكاتدا ده‌بێت ڕێز له داموده‌زگا و دامه‌زراوه‌كانی حكوومه‌تیش بگیرێ كه هی هه‌موو گه‌لی عێراقن و خزمه‌ت ده‌گه‌یه‌نن.
جه‌ختیشی كرده‌وه كه ده‌بێت ڕێ بۆ داموده‌زگاكانی حكوومه‌ت خۆش بكرێ كه كاری ئاسایی خۆیان بكه‌ن كه خزمه‌تكردنی هه‌موو گه‌لی عێراقه به‌گشتی.
کۆمێنت (0)
تا ئێستا هیچ کۆمێنتێک نەکراوە.