باڵیۆزخانه‌ی كوێت له شاری به‌غدا داوای له هاووڵاتییانی وڵاته‌كه‌ی كرد هه‌ر ئێستا خاكی عێراق جێبهێڵن به‌هۆی ئاڵۆزبوونی زیاتری دۆخی ئه‌و وڵاته‌وه.
باڵیۆزخانه‌ی كوێت له شاری به‌غدا له به‌یاننامه‌یه‌كدا ڕایگه‌یاند: هاووڵاتییانی كوێتی له شاری به‌غدا و سه‌رجه‌م پارێزگاكانی تر ئاگادار ده‌كه‌ینه‌وه كه هه‌ر ئێستا خاكی عێراق جێبهێڵن.
ڕاشیگه‌یاند: ئه‌و هاووڵاتییانه‌ش كه ده‌یانه‌وێ سه‌ردانی عێراق بكه‌ن، با گه‌شته‌كانیان دوا بخه‌ن به‌هۆی ئاڵۆزی دۆخی ئێستای وڵاته‌كه‌وه.
نیوه‌ڕۆی ئه‌مڕۆ دووشه‌م موقته‌دا سه‌در ڕێبه‌ری ڕه‌وتی سه‌در وازهێنانی یه‌كجاری له كاری سیاسی ڕاگه‌یاند و ئه‌مه‌ش بووه هۆی توڕه‌بوونی لایه‌نگرانی ڕه‌وته‌كه‌ی و فراوانبوونی خۆپیشاندانه‌كانی ناوچه‌ی سه‌وزی به‌غدا.
خۆپیشانده‌ران چوونه نێو باره‌گاكانی حكوومه‌ت له ناوچه‌ی سه‌وز و كۆشكی سه‌لامی سه‌رۆك كۆمار و سه‌رۆكایه‌تی حكوومه‌تیان كۆنتڕۆڵ كرد و دواتریش چه‌ندان داموده‌زگای تریش له سه‌رجه‌م پارێزگاكانی عێراق كه‌وتنه ده‌ست خۆپیشانده‌رانه‌وه.
به‌هۆی ئه‌م ئاڵۆزی و گرژییانه‌ی به‌غدای پایته‌خت و پارێزگاكانی تری عێراق به‌لایه‌نی كه‌م 12 خۆپیشانده‌ر گیانیان له‌ده‌ست دا و زیاتر له 150ی تریش به سه‌ختی بریندار بوون.
کۆمێنت (0)
تا ئێستا هیچ کۆمێنتێک نەکراوە.