په‌رله‌مانی كوردستان ده‌ست به‌ كۆبوونه‌وه‌كانی ده‌كاته‌وه‌

سه‌رۆكی په‌رله‌مانی كوردستان بانگهێشتی گشت ئه‌ندامه‌كانی په‌رله‌مانی كوردستانی كرد بۆ كۆبوونه‌وه‌ و ده‌ستپێكردنه‌وه‌ی دانیشتنه‌كانی.

د. ڕێواز فائق سەرۆکی پەرلەمانی کوردستان، بانگهێشتی گشت ئه‌ندامانی په‌رله‌مانی كرد بۆ دانیشتنی ژماره‌ (1)ی ئاسایی خولی پایزەی ساڵی چوارەم له‌ خولی هه‌ڵبژاردنی پێنجه‌می په‌رله‌مانی كوردستان – عێراق.

كۆبوونه‌وه‌كه‌ش له‌ كاتژمێر (11)ی پێش نیوەڕۆ ڕۆژی پێنجشەم ڕێكه‌وتی 1/9/2022 ده‌ستپێده‌كات.

بەرنامەی کاری دانیشتنەکەش بەم شێوەیەی خوارەوە ده‌بێت:-

یه‌كه‌م: یەك دەقیقە بێدەنگ وەستان بۆ ڕێزلێنان لە گیانی شەهیدانی كوردستان و عێراق لەگەڵ مارشی نەتەوەیی.

دووه‌م: كردنەوەی خولی پایزەی ساڵی چوارەم لە خولی پێنجەمی هەڵبژاردن، لەلایەن سەرۆكی پەرلەمان بەپێی حوكمی بڕگەی (یەكەم) لە ماددەی (7)ی پەیڕەوی ناوخۆی پەرلەمانی كوردستان.

سێیەم: وتەی سەرۆكی پەرلەمان بە بۆنەی كردنەوەی خولی پایزەی ساڵی چوارەم لە خولی پێنجەمی هەڵبژاردنی پەرلەمانی كوردستان ــ عێراق.

چوارەم: وتەی سەرۆك فراكسیۆنەكانی پەرلەمان بەبۆنەی كردنەوەی خولی پایزەی ساڵی چوارەم لە خولی پێنجەمی هەڵبژاردنی پەرلەمانی كوردستان - عێراق، لە (5) پێنچ خولەك زیاتر نەبێت.

پێنجەم: خوێندنەوەی یەكەم بۆ ئەم پڕۆژە یاسایانەی خوارەوە، پشتبەستن بە حوكمی بڕگەی (دووەم)ی ماددەی (78) و بڕگەی (یەكەم)ی ماددەی (83) لە پەیڕەوی ناوخۆی پەرلەمانی كوردستان:

پڕۆژە یاسای (كار لە هەرێمی كوردستان - عێراق).

پڕۆژە یاسای (هەمواری یەكەمی یاسای ئەنجوومەنی شورای هەرێمی كوردستان - عێراق ژمارە (14)ی ساڵی 2008).