سعوودیە پشتیوانی لە ئاسایش و سەقامگیریی عێراق دەكات

وەزیری دەرەوەی عێراق، فوئاد حوسێن دەرەنجامی سەردانەكەی بۆ ئێران لەگەڵ هاوتا سعوودیەكەی، فەیسەڵ بن فەرحان تاوتوێ كرد.
بەگوێرەی ئەو راگەیەندراوەی كە لە وەزارەتی دەرەوەی عێراقەوە بڵاوكراوەتەوە، فوئاد حوسێن و فەیسەڵ بن فەرحان پەیوەندییەكی تەلەفۆنییان ئەنجامداوە.
لە میانی پەیوەندییەكەدا، وەزیری دەرەوەی سعوودیە پشتیوانی وڵاتەكەی بۆ گەل و حكوومەتی عێراق دووپات كردووەتەوە لە بارەی پێشهاتەكانی ئەم دواییەی وڵاتەكە و رایگەیاندووە ریاز ئامادەیە بۆ پێشكەشكردنی هەر پشتیوانییەك كە ببێتە هۆی دووركەوتنەوەی عێراق و گەلەكەی لە هەر دابەشبوون ململانێیەكی ناوخۆی و جەختی لەوەشكردووەتەوە كە وڵاتەكەی پشتیوانی لە ئاسایش و سەقامگیریی عێراق دەكات.
لە بەشێكی دیكەی پەیوەندییە تەلەفۆنییەكەدا هەردوولا باسیان لە دەرەنجامەكانی سەردانی وەزیری دەرەوەی عێراق بۆ ئێران كرد و باسیان لە پەیوەندییە دوو قۆڵییەكانی نێوان ریاز و تاران كرد.
لە دوو رۆژی رابردوو، وەزیری دەرەوەی عێراق، فوئاد حوسێن بە سەردانێكی فەرمی گەیشتە تاران و جگە لە كۆبوونەوە لەگەڵ هاوتا ئێرانییەكەی، هاوكات لەگەڵ هەریەك لە سەركۆماری ئێران، ئیبراهیم رەئیسی و سكرتێری گشتیی ئەنجوومەنی باڵای ئاسایشی نەتەوەیی، عەلی شەمخانی، كۆبووەوە.
جێی ئاماژەیە، بۆ ئاساییكردنەوەی پەیوەندییەكی نێوان تاران و ریاز، تا ئێستا عێراق میوانداریی چەند گەڕێكی دانوستانی لەنێوان ئێران و سعوودیەدا كردووە.