سەرۆکی ئەمریکا ئەمڕۆ چوارشەممە 31ـی 08ـی 2022 پەیوەندی بە سەرۆک وەزیرانی عێراق کرد و دوایین پێشهاتەکانی دۆخی عێراقیان تاوتوێ کرد.
ئەنجوومەنی وەزیرانی عێراق ناوەڕۆکی پەیوەندییەکەی نێوان جۆ بایدن سەرۆکی ئەمریکا و مستەفا کازمی، سەرۆک وەزیرانی عێراقی بڵاوی کردەوە کە لە میانی پەیوەندییەکە بایدن، پشتیوانی ئەمریکای بۆ عێراقێکی سەربەخۆ و خاوەن سەروەری خۆی ڕاگەیاند، وەک لە ڕێککەوتنی ستراتیژی نێوان ئەمریکا و عێراق هاتووە.
ئەوەشی خستووەتەڕوو کە بایدن بایدن ستایشی ڕۆڵ و سەرکردایەتی زیرەکانەی کازمی کرد لە کاتی دروستبوونی ئاڵۆزی و گرژییەکانی چەند ڕۆژی ڕابردووی عێراق.
لە ڕاگەیەنراوەکە ئاماژە بەوە دراوە کە "هاوکات سەرۆکی ئەمریکا ستایشی ڕۆڵی هێزە ئەمنییەکانی عێراقی کرد و سەرەخۆشی ئاراستەی کەسوکاری شەهیدانی عێراق کرد."
ئاماژە بەوەش دراوە کە بایدن لە پەیوەندییەکەدا داوای لە هەموو سەرکردەکانی عێراق کرد کە بەشداربن لە گفتوگۆیەکی نیشتمانی، لەپێناو دۆزینەوەی ڕێگەچارەیەک بەپێی دەستوور و یاسا بۆ دەرچوون لەو چەقبەستووییەی ئێستای عێراق.
لە ڕاگەیەنراوەکەی ئەنجوومەنی وەزیران ئەوەش خرایەڕوو کە "بایدن هەوڵەکانی کازمی بۆ ئارامکردنەوەی گرژییەکانی ناوچەکە لە ڕێگەی دیالۆگ و دیپلۆماسییەوە بە گرنگ زانی و پشتیوانی تەواوی خۆی بۆ ئەو هەوڵانە دەربڕی."
کۆمێنت (0)
تا ئێستا هیچ کۆمێنتێک نەکراوە.