ئەمڕۆ پێنجشەم بە ئامادەبوونی د.سامان بەرزنجى وەزیرى تەندروستى حکوومەتى هەرێم و ئومێد خۆشناو پارێزگاری هەولێر، بە گوژمەى یەک ملیار دینار بەردی بناغەی پڕۆژەى دروستکردنی بنکەی تەندروستی جۆرى A لە گەڕەکی زیلان له شاری هه‌ولێر دانرا، کە زەوی پڕۆژەکە لەلایەن سەرۆکایەتی شارەوانی هەولێر دابینکراوە و لەسەر ئەرکى خێرخواز پارێزەر (سەفین یاسین) دروست دەکرێت.
لە ڕێورەسمەکەدا پارێزگارى هەولێر لە گوتارێکدا، پیرۆزبایی لە دانیشتووانى گەڕەکى ناوبراو کرد و ڕایگەیاند: "بە ناوى سەرۆکى حکوومەتى هەرێمى کوردستان مەسروربارزانی و پارێزگاى هەولێر دەستخۆشى لە سەفین یاسین دەکەین کە وەک خێرخوازێک لە شارى هەولێر لە ماوەى چەند ساڵى ڕابردوودا لە زۆر بوار و سێکتەردا جێ پەنجەی دیاربووە.
ڕاشیگه‌یاند: هەروەها دەستخۆشى لە سەرجەم خێرخوازانى شارەکەمان دەکەین کە هاوتەریب لەگەڵ پڕۆژە خزمەتگوزارییەکانى حکوومەتى هەرێمى کوردستان، وەکو هەولێر و خەڵکى هەولێر هەمیشە پێشەنگ بوونە لە کارى خێرخوازى و مرۆیی دا و شانازیان پێ دەکەین.
جه‌ختیشی كرده‌وه كه شاهێدى ئەوەش دەدەین کۆمپانیاکان و خێرخوازانى شارەکەمان جگە لە بەپیروەچوونى خەڵکى ئاوارە و لێقەوماو و یارمەتیدانى هەژار و کەمدەرامەتان کارى گەورەیان ئەنجامداوە، لەو ماوەى ڕابردووشدا جگە لە دروستکردنى 14 قوتابخانه، چەندین پڕۆژەى دیکەیان ئەنجامداوە.
کۆمێنت (0)
تا ئێستا هیچ کۆمێنتێک نەکراوە.