گوته‌بیژی پۆلیسی گه‌رمیان ئاشكرای كرد كه ئه‌وانه‌ی له ته‌قینه‌وه‌كه‌ی ئه‌مڕۆی شارۆچكه‌ی كفری بریندار بوون، كوڕ و باوكن.
مقه‌ده‌م عه‌لی جه‌مار قدووری گوته‌بیژی پۆلیسی گه‌رمیان ڕایگه‌یاند: بەیانی ئەمڕۆ هەینی لە شارۆچكه‌ی کفری لە کاتی کارکردندا لەنێو ئاسنفرۆشەکانی دەرەوەی شارۆچكه‌كه، مین بە کوڕ و باوکێکدا ته‌قییه‌وه.
ڕاشیگه‌یاند: باوكه‌كه ناوی (ط - ح - ع ) لە دایکبووی 1979 و كوڕه‌كه‌شی ناوی (ع - ط - ح) لەدایکبووی 2006ه.
هه‌روه‌ها ڕایگه‌یاند: به‌هۆی ته‌قینه‌وه‌كه باوك و كوڕه‌كه هەردووکیان برینداربوون و بە مەبەستی چارەسەری ڕەوانەی نەخۆشخانەی شارۆچكه‌ی کفری کراون.
گوته‌بیژی پۆلیسی گه‌رمیان جه‌ختیشی كرده‌وه كه ئه‌وان وه‌ك پۆلیس چوونەتە شوێنی ڕووداوەکە و دەستیان بە لێکۆڵینەوە کردووە.
پێشتر محه‌مه‌د ساڵح په‌یامنێری (كوردستان تیڤی) ڕایگه‌یاندبوو: سه‌رله‌به‌یانی ئه‌مڕۆ هه‌ینی له كارگه‌یه‌كی ئاسن له شارۆچكه‌ی كفری له‌نێو پاشماوه‌كان و له‌كاتی كۆكردنه‌وه‌ی ئاسندا، مینێك ته‌قییه‌وه.
ڕاشیگه‌یاندبوو: له ئه‌نجامی ته‌قینه‌وه‌ی مینه‌كه، دوو كرێكاری كارگه ئاسنه‌كه كه كاریان كۆكردنه‌وه و هه‌ڵگرتنی ئاسنه‌كانه، بریندار بوون و ڕه‌وانه‌ی نه‌خۆشخانه كراون.
کۆمێنت (0)
تا ئێستا هیچ کۆمێنتێک نەکراوە.