لە عێراقدا تا ئێستا بەكارهێنانی تەندووری قوڕ خواستی لەسەرە

هەرچەندە لە سەرتاسەری عێراق فڕنی سەموون هەیە، بەڵام تا ئێستا لە هەندێك ناوچە، تەندووری قوڕ بەكاردەهێندرێت.
بەكارهێنانی ئەم جۆرە تەندوورانە لە عێراق، مێژووییەكی هەزاران ساڵەی هەیە و وا باس دەكرێت كە بۆ یەكەمجار لە شاری مووسڵ تەندووری قوڕ دروست كراوە، وێڕای بەرەوپێشچوونی تەكنەلۆجیاش تا ئێستا بەكارهێنانی ئەم تەندوورانە سەرچاوەی بژێوی ژیانی هەندێك كەسن.
لەم تەندوورانەدا كارەبا و غاز بەكارناهێنرێن و لەبری ئەوە سوود لە دار دەبیندرێت. بۆ دروستكردنی نانی عێراقیش كە بە "نانی بازاڕ" ناسراوە، هەر ئەم جۆرە تەندوورە بەكاردەهێنرێت.
هەروەها لە گوندەكاندا ژنان لە بەیانییەكی زوودا نان دروست دەكەن و لەگەڵ خوانی بەیانیدا نانی گەرم و تازە دەخۆن. ئەو میوانانەشی سەردانی گوندەكان دەكەن بە شێوەیەكی تایبەت نانی تەندووریان پێشكەش دەكرێت.
ئەو قوڕە سوورەی لە دروستكردنی تەندووردا بەكاردەهێندرێت لە ناوچەی "دەریای نەجەف"ەوە دەهێندرێت و لە ناوچەی كازمییەی شاری بەغدا لەلایەن وەستای تایبەتەوە تەندووری لێ دروست دەكرێت.
لەوباریەوە یەكێك لەو وەستایانە بە ناوی ناجیح قەواز كە كاری دروستكردنی تەندوور دەكات گوتی: دروستكردنی یەك تەندوور لایەنی كەم پێویستی بە سێ رۆژ كاركردن هەیە، نرخەكانیش بە گوێرەی قەبارەی تەندوورەكە دەگۆڕێت، نرخی تەندووری بچووك نزیكەی 50 دۆلارە و تەندووری گەورەش نرخەكەی نزیكەی 100 دۆلارە.