چاوی ڕەشی جوانە پیاو دەکا بەدێوانە
چین چینە زوڵفی ئاڵی داهاتووە بێ شانە
سنگی سپی کوێستانە جێڕاوگەی عاشقانە.
یه‌كێكه له سه‌ربه‌ندی گۆرانیه خۆشه‌كانی هونه‌رمه‌ند ( جه‌لال سه‌عید)
له‌كوچه و كۆڵان و گه‌ڕه‌كه دێرینه‌كانی شاری هه‌ولێره‌وه تێیچریكاند و به‌ده‌نگه به‌سۆزو خۆشه‌كه‌ی پانتاییه‌كی بۆخۆی داگیركرد، ڕاسته له‌م شاره دێرینه‌ی كوردستان ( هه‌ولێر) گه‌وره بوو ، گه‌شه‌ی دا به‌هونه‌ره‌كه‌ی ، به‌ڵام ده‌نگ و هونه‌ره‌كه‌ی بۆ هه‌موو كورد و كوردستان بوو،
هونه‌رمه‌ند ( جه‌لال سه‌عید) گه‌نجێكی خوێن گه‌رمی باڵابه‌رزی جوان و قه‌شه‌نگ و شیكپۆشی جل و به‌رگی كوردیی، كه‌سێكی هێمن و دڵساف و هه‌ست ناسك و خاوه‌ن نه‌فسێكی به‌رز ، ماوه‌ی زیاتر له (40) ساڵ خزمه‌تكردن به‌هونه‌ری مۆسیقا و گۆرانی كوردی ، هونه‌ره‌كه‌ی بۆ هونه‌ر پێشكه‌ش كرد ، نه‌ك هونه‌ره‌كه‌ی بخاته خزمه‌تی سه‌ر‌وه‌ت و سامان.
له‌وماوه دوور و درێژه‌ی ژیانی هونه‌ریدا جه‌لال سه‌عید، به‌سه‌دان گۆرانی به‌ده‌نگ و گه‌رووه پاراوه كوردییه‌كه‌ی تۆماركردوه له ئاهه‌نگ و بۆنه‌كان و ته‌له‌فزیۆنه‌كاندا، ڕۆلێكی گرنگ ودیاری هه‌بووه له بوژاندنه‌وه و پاراستنی گۆرانییه فۆلكلۆرییه‌كان، هه‌روه‌هاخاوه‌نی ده‌یان شه‌وئاهه‌نگ و دانیشتنی ئازیزان و كۆڕی باده‌نۆشاناندا به‌ده‌نگه خۆشه‌كه‌ی به‌هونه‌ره جوان و دڵنشینه‌كه‌ی ئاماده‌بوانی سه‌رمه‌ست وسه‌رحاڵ و كه‌یفخۆش كردووه.
جه‌لال سه‌عیدی هونه‌رمه‌ند ، هونه‌ره‌كه‌ی ته‌نها وابه‌سته نه‌كردووه به‌شاره جوانه‌كه‌ی هه‌ولێره‌وه به‌ڵكو هه‌موو شارو شارۆچكه‌یه‌كی وڵاته‌كه‌ی به هی خۆیی و خۆی به‌خانه‌خوێ زانیوه.
هونه‌رمه‌ند جه‌لال سه‌عید له‌شاره‌كه‌ی پێشه‌وا قازی محه‌مه‌د و هه‌ژار و هێمن و محه‌مه‌دی ماملێ وه بۆ هه‌ولێری شاری حه‌یران و مه‌قامات و ئه‌كله‌نجه و قۆریات ..!
باوكی هونه‌رمه‌ند ( سه‌عید ڕه‌مه‌زان حسێن) پیاوێكی هه‌ژار و كه‌م ده‌رامه‌ت و نه‌دار ، ده‌فژه‌نێكی به‌توانا، گه‌ڕیده بووه و نان و بژێوی ژیانی له‌ڕێی هونه‌ری ده‌فژه‌نینه‌وه په‌یداكردووه، ئه‌م پیاوه ده‌فژه‌نه گه‌ڕۆكه له‌سه‌ره‌تای په‌نجاكانی سه‌ده‌ی پێشوو، ڕووده‌كاته ڕۆژهه‌ڵاتی كوردستان و له‌شاره جوان و مه‌ڵبه‌نده‌كه‌ی كوردایه‌تی و هونه‌ری ڕه‌سه‌نی كوردی شاری ( مه‌هاباد) نیشته‌جێ ده‌بێت ، له‌شاری مه‌هاباد و له‌ساڵی (1953) په‌روه‌ردگار كوڕێك به سه‌عید ڕه‌مه‌زانی ده‌فژه‌ن ده‌به‌خشێت ونێوی ده‌نێن ( جه‌لال) .
(جه‌لال سه‌عید ڕه‌مه‌زان حسێن) له‌نێوه‌ندی هونه‌ری و كۆمه‌ڵایه‌تی به ( جه‌لال سه‌عید) نێوبراوه و ناسراوه.
دوای ئه‌وه‌ی ته‌مه‌نی جه‌لالی منداڵ ده‌بێته (3) ساڵ، خانه‌واده‌كه‌ی بنه و بارگه ده‌پێچنه‌وه‌و ده‌گه‌ڕێنه‌وه باشووری كوردستان و ماوه‌ی چه‌ند مانگێك له‌شاره‌كه‌ی ( پاشای كۆره‌و وه‌ستا ڕه‌جه‌ب) شاری ( ڕواندز) جێگیر ده‌بن ، له‌ساڵی (1956) ده‌گه‌ڕێنه‌وه شاری هه‌ولێر .
له‌ساڵی (1959) جه‌لال وه‌ك هه‌رمنداڵێكی دیكه‌ی كۆڵان و گه‌ڕه‌ك و شاره‌كه‌ی ده‌یخه‌نه به‌رخوێندن له‌قوتابخانه‌ی ( ئیبن خه‌له‌كان) ناوی تۆمارده‌كه‌ن و ده‌خرێته به‌رخوێندن.
ده‌بێت هه‌میشه به حورمه‌ته‌وه ئاماژه به‌ڕۆڵ و دڵسۆزیی مامۆستای هونه‌ر بده‌ین له قوتابخانه‌كاندا، چونكه له‌ڕێی وانه‌ی هونه‌ره‌وه ، به‌هره‌مه‌ند و قوتابیه ده‌نگخۆشه‌كان ده‌ست نیشان كراون و دۆزراونه‌ته‌وه، له‌گۆڕه‌پانی قوتابخانه‌كان به‌رله‌چوونه ژووره‌وه بۆ وانه‌كانی خوێندن ، قوتابیان ڕیزكراون و سرووده نیشتمانی و نه‌ته‌وه‌ییه‌كان یان خوێندووه، جه‌لال سه‌عیدی هونه‌رمه‌ند یه‌كێك بووه له‌و به‌هره‌مه‌نده ده‌نگخۆشانه كه‌له‌قۆناغی خوێندنی سه‌ره‌تاییه‌وه‌ئه‌وبه‌هره‌یان تێدا دۆزیوه‌ته‌وه‌و له‌لایه‌ن مامۆستاكان و هاوڕێ قوتابیه‌كانیه‌وه ده‌ستخۆشیی لێده‌كه‌ن و زیاتر هانی ده‌ده‌ن كه به‌رده‌وام بێت، ده‌نگخۆشییه‌كه‌ی جه‌لال سه‌عید له‌ته‌واوی قوتابخانه‌كه‌ی پێی ئاشنا ده‌بن و ڕێز له‌خۆیی و به‌هره‌كه‌ی ده‌گرن ( ئه‌و ڕێزگرتنه‌م له‌لایه‌ن مامۆستاكانم ، زۆر زۆر هانیدام كه‌ڕێی گۆرانی ووتن فه‌رامۆش نه‌كه‌م و به‌رده‌وام بم ) (1)
هونه‌رمه‌ند به‌سه‌ركه‌وتوویی له‌ساڵی (1966) خوێندنی سه‌ره‌تایی ته‌واوده‌كات و هه‌نگاو بۆ قۆناغی ناوه‌ندی هه‌ڵده‌گرێت، له‌گه‌ڵ خوێندنه‌كه‌ی سۆزو هه‌ست و خۆشه‌ویستی بۆهونه‌ر و گۆرانی درێژه پێده‌دات و تاكه سه‌رچاوه‌یه‌ك كه له‌هونه‌ر و سۆزی ده‌نگی هونه‌رمه‌ندان چێژ وه‌رده‌گرێت و ئاشنا ده‌بێت به گۆرانی ، ڕادیۆی كوردی به‌غدایه، ڕۆژانه كات ته‌رخان ده‌كات بۆ بیستنی گۆرانییه‌كانی هونه‌رمه‌ندان ( عه‌لی مه‌ردان ، حه‌سه‌ن زیره‌ك ، محه‌مه‌دی ماملێ ، تایه‌ر تۆفیق و برایانی زێ زێ) ده‌نگ و هونه‌ری ئه‌م هونه‌رمه‌نده نه‌مرانه ده‌بنه هه‌وێنی ، هونه‌رێكی خۆڕسك و بێخه‌وش له‌هه‌ست و ناخی جه‌لال سه‌عید دا ، له‌گه‌ڵ گوێگرتن له‌و گۆرانیانه هه‌ست و ڕۆحی جه‌لال سه‌عید په‌لكێشی تێكست و میلۆدی ئه‌و گۆرانیانه ده‌بێت و له‌به‌رخۆیه‌وه ده‌یانڵێته‌وه‌و هێدی هێدی له‌سینه‌یدا تۆماریان ده‌كات و وه‌ك ئه‌رشیفێك له‌هه‌ستیدا ده‌یانهێڵیته‌وه و پێیان ده‌ژی.
به‌داخه‌وه نه‌داری و كه‌مده‌راتی خانه‌واده‌كان هه‌میشه بۆته له‌مپه‌ر له‌به‌رامبه‌ر منداڵه‌كانیان كه‌نه‌توانن درێژه به‌خوێندن بده‌ن، جه‌لال سه‌عیدی هونه‌رمه‌ند ، تا پۆلی دووه‌می ناوه‌ندی ده‌خوێنێ( گه‌ر باسی قۆناغی منداڵیم بكه‌م ، ده‌توانم بڵێم له‌ناخۆشیی زیاتر هیچم نه‌دیوه، به‌هۆی ئه‌م سه‌ختییه‌وه خوێندنیشم بۆته‌واو نه‌كرا..؟!) (2) .
به‌نائومێدییه‌وه ڕووده‌كاته بازاڕو شان ده‌داته به‌ركاسبی كردن له‌پێناو دابینكردنی بژێوی ژیانی خانه‌واده‌كه‌ی ، ماوه‌یه‌ك شاگرد چایچی و ماوه‌یه‌ك كرێكاری و دواتر ده‌بێته ده‌ستگێڕی فرۆشتنی پۆشاكی منداڵانه له‌ناو بازاڕه‌كانی شاری هه‌ولێر ، سه‌ره‌ڕای فرۆشتنی هێزی جه‌سته‌ی له‌پێناو نان دا ، به‌ڵام هونه‌ر ژیانی داگیركردووه و ماندووبوونه‌كه‌ی ڕۆژانه‌ی له‌بیرده‌باته‌وه ، ڕۆژ به‌ڕۆژ حه‌زو خولیاو ئاره‌زووی بۆ كڕینی ( ته‌سجیلێك ) بووه تا شه‌وانه له‌كاتی پشوودانیدا به‌ده‌نگ و هونه‌ری هونه‌رمه‌ندان ڕۆحی ئارام بكاته‌وه، دوای ماوه‌یه‌ك تێكۆشان و كاسبی كردن بڕه پاره‌یه‌ك كۆده‌كاته‌وه و ئاواته‌كه‌ی دێنێته‌دی و ته‌سجیلێك له‌گه‌ڵ كۆمه‌ڵێك كاسێتی هونه‌رمه‌ندانی باوی ئه‌و سه‌رده‌مه ده‌كڕێت و به‌هه‌ست و سه‌لیقه‌یه‌كی هونه‌رییه‌وه گوێ ڕاده‌دێرێ بۆ ده‌نگ و تێكست و میلۆدییه‌كان. وه‌ك پێشتر ئاماژه‌مان پێدا، كه باوكی هونه‌رمه‌ند ده‌فژه‌نێكی به‌توانا بووه ، ئه‌و شێوازو هونه‌ری باوكی كاریگه‌ر له‌سه‌ر هونه‌رمه‌ند داده‌نێت و خۆی فێری هه‌ردوو ئامێری ( ده‌ف و زه‌ڕب) ده‌كات.
كاتێك ته‌مه‌نی هه‌ڵده‌كشێ و پێ ده‌نێته ته‌مه‌نی (16) ساڵییه‌وه(1969) هه‌ستی نه‌ته‌وایه‌تی له‌ناخیدا چرۆ ده‌كات و چه‌كی پیرۆزی پێشمه‌رگایه‌تی ده‌كاته شانی و ده‌بێته پێشمه‌رگه‌ی شۆڕشی ئه‌یلول،تا به‌یانی (11ی ئاداری 1970) .
له‌وكه‌شه ئارامه‌ی دوای به‌یانی 11ی ئاداری 1970، هونه‌رمه‌ند جه‌لال سه‌عید، له‌ساڵی (1970) له‌گه‌ڵ
( فازیلی دێوانه) ی سازژه‌ن یه‌كه‌م كاسێت تۆمارده‌كات و ئه‌م كاسێته له‌نێو خه‌ڵكیدا بڵاوده‌بێته‌وه، ده‌نگ و هونه‌ری جه‌لال سه‌عید ناوبانگ ده‌رده‌كات و ، ئه‌م ناساندنه ڕێگه خۆش ده‌كات بۆ ده‌نگه به‌سۆزو هه‌ست بزوێنه‌كه‌ی جه‌لال سه‌عیدو بانگهێشت بكرێت بۆ زه‌ماوه‌ند و بوك گواستنه‌وه، ( ده‌توانم بڵێم نیوه‌ی شاری هه‌ولێرم به‌بووك و زاوا كردووه، ئه‌وان ئێستا یاده‌وه‌رییه‌كانیان له‌یاد ماوه و هه‌مووشیان نه‌وه‌یان هه‌یه ) (3) .
ئه‌م هونه‌رمه‌نده ڕۆژ به‌ڕۆژ هونه‌ره‌كه‌ی ده‌ناسرێت و ده‌بێته جێی ستایش و ڕه‌زامه‌ندی خه‌ڵكی و پێشوازی گه‌رم له‌كه‌سایه‌تی و هونه‌ره‌كه‌ی كراوه.
له‌به‌هاری ساڵی (1974) به‌هۆی پاشگه‌زبوونه‌وه‌ی حیزبی به‌عس له به‌ڵێنه‌كان و بڕیاره‌كانی 11ی ئاداری 1970 ، شۆڕش ده‌ست پێده‌كاته‌وه و جه‌لال سه‌عیدی هونه‌رمه‌ند وه‌ك هه‌ستێكی نه‌ته‌وه‌یی جارێكی دیكه خۆی له‌به‌ره‌ی گه‌له‌كه‌یدا ده‌بینێته‌وه و ده‌بێته‌وه به‌پێشمه‌رگه تا نسكۆی ( به‌هاری 1975) وه‌ك زۆرینه‌ی هاوڕێ پێشمه‌رگه‌كانی ڕووده‌كاته ڕۆژهه‌ڵاتی كوردستان و وه‌ك پێشمه‌رگه‌یه‌كی ئاواره له‌شاری (مه‌هاباد) نیشته‌جێ ده‌بێت، له‌شاری مه‌هابادیش كاسێتێك تۆمارده‌كات له‌گه‌ڵ هونه‌رمه‌ندێكی ژه‌نیاری تار، ئه‌م هونه‌رمه‌نده ژه‌نیاره پێشتر كاری هونه‌ری له‌گه‌ڵ هونه‌رمه‌ند و بلیمه‌تی نه‌مری گه‌له‌كه‌مان (حه‌سه‌ن زیره‌ك) كردووه.
جه‌لال سه‌عید له‌ساڵی (1975) له‌شاری مه‌هاباد، له‌گه‌ڵ خاتوو ( خه‌دیجه مه‌جید) ژیانی هاوسه‌ری پێكدێنێ و دوای چه‌ند مانگێك خۆیی و هاوسه‌ره‌كه‌ی ده‌گه‌ڕێنه‌وه شاری هه‌ولێر ، به‌روبوومی ئه‌و هاوسه‌رگیرییه( 8) منداڵه ، (2) كوڕو (6) كچ ، كوڕه گه‌وره‌كه‌ی ناوی ( شه‌ماڵ) ه و ئه‌ویش ده‌نگی خۆشه‌و ڕێبوارێكی دڵسۆزی ڕێگا پیرۆزه‌كه‌ی باوكیه‌تی .
ئه‌م ده‌نگه ڕه‌سه‌نه چیاییه دوای ئه‌وه‌ی ده‌گه‌ڕێته‌وه شاری هه‌ولێر و سه‌رقاڵی كارو كه‌سابه‌ت ده‌بێت ، له‌پاڵیشیدا هونه‌ركه‌شی فه‌رامۆش ناكات و تێكه‌ڵاو به‌دنیای هونه‌ر و هونه‌رمه‌ندانی شاری هه‌ولێر ده‌بێت ، قۆناغێكی نوێ له‌ژیانی هونه‌ری جه‌لال سه‌عید ده‌ست پێده‌كات ، ( كه گه‌ڕاینه‌وه كه‌وتمه نێو دنیای ئه‌گله‌نجه و ئاهه‌نگه‌كانی هه‌ولێرییان ئه‌وكات باوبوو، له‌گه‌ڵ هونه‌رمه‌ندان تاهیر تۆفیق ، مشكۆ ، محه‌مه‌د ئه‌ربیلی ، حه‌یده‌ر به‌قاڵ ، فوئادئه‌حمه‌د و محه‌مه‌د جه‌زا به‌شداریم ده‌كرد) (4).
هونه‌رمه‌ند یه‌كه‌م كاری هونه‌ری بۆ ته‌له‌فزیۆنی كه‌ركوك ، گۆرانییه‌ك بووه به‌ناوی ( كاڵی وه‌ی كاڵی) له‌ئاواز و هۆنراوه‌ی فۆلكلۆر بووه، ( ئه‌م گۆرانییه ته‌نها یه‌ك جار له‌ته‌له‌فزیۆنی كه‌ركوك په‌خشكراوه، دواتر ڕاگیراوه هۆكاره‌كه‌ی نادیاربووه ) (5) .
دواتر له‌ساڵی (1978) له‌گه‌ڵ تیپی هونه‌ری هه‌ولێر چه‌ند گۆرانییه‌ك تۆمارده‌كات، ئه‌وبه‌رهه‌مه‌ی تیپی هونه‌ری هه‌ولێر به‌ته‌واوی كوردستاندا بڵاو بۆوه و ده‌نگدانه‌وه‌یه‌كی زۆرباشی هه‌بوو له‌نێو جه‌ماوه‌ردا ، هه‌مان ئه‌و به‌رهه‌مانه له‌ته‌له‌فزیۆنی به‌غدا به‌شێوه‌ی ( ڕه‌نگاو ڕه‌نگ) تۆماركرا و بڵابۆوه ، هونه‌رمه‌ندانی ئه‌وبه‌رهه‌مه‌ی تیپی هونه‌ری هه‌ولێر ( سه‌لاح محه‌مه‌د ، محه‌مه‌د جه‌زا ، ئیبراهیم سابیر ، عاره‌ب عوسمان ، قادر زیره‌ك و جه‌لال سه‌عید و ....تاد)
دواتر به‌هاوكاری و پشتیوانی هه‌ردوو مۆسیقاژه‌نی نه‌ته‌وه‌كه‌مان ( وریا ئه‌حمه‌د و ڕزگار خۆشناو ) گۆرانی ( دڵ سوتاو) ی بۆتۆمارده‌كه‌ن.
له‌شاری هه‌ولێر له‌سه‌ر پێشنیاری چه‌ند هونه‌رمه‌ندێكی دڵسۆ زو خه‌مخۆری هونه‌ر ، بۆمه‌به‌ستی به‌رزڕاگرتن و پاراستنی هونه‌ری میللی و هه‌ڵپه‌ڕكێی كوردی و بوژاندنه‌وه‌ی ئه‌و هونه‌ره به‌رزه‌و ناساندنی ئه‌و سامانه نه‌ته‌وه‌ییه، له‌ڕێكه‌وتی ( 5/2/1979) (تیپی هونه‌ری میللی هه‌ولێر ) داده‌مه‌زرێت، ئه‌م تیپه هونه‌رییه له‌سه‌ره‌تاوه به‌گوڕو تینێكی هونه‌ری میللی جوانه‌وه ده‌ستیان به‌كارو چالاكییه هونه‌رییه‌كانیان كردووه، جیا له‌ئه‌ندامه دڵسۆزه‌كانی ئه‌و تیپه ، به‌هاوكاری و پشتیوانی چه‌ندین هونه‌رمه‌ندی موزیكژه‌ن و هه‌روه‌ها چه‌ند هونه‌رمه‌ندێكی ده‌نگخۆش كه یه‌كێك له‌و هونه‌رمه‌ندانه به‌ده‌نگه خۆش و ڕه‌سه‌نه كوردییه‌كه‌ی تابلۆ هونه‌رییه‌كانی جوانتر كردووه و شه‌وق و زه‌وقێكی پڕجۆشی هونه‌ری به‌نمایشی تابلۆكان داوه و هه‌میشه له‌و نمایشه هونه‌رییانه ده‌نگ و هونه‌ره‌كه‌ی دیار و به‌رچاو بووه ، ئه‌ویش هونه‌رمه‌ند جه‌لال سه‌عید ه، له‌گه‌ڵ هاوڕێ هونه‌رمه‌نده‌كانی وه‌ك( سابیر عه‌بدولڕه‌حمان ، قادر زیره‌ك ، نیزام شكور و زیاد ئه‌سعه‌د و ...تاد) ،یه‌كێك له‌هاوڕێ دێرینه‌كانی هونه‌رمه‌ند جه‌لال سه‌عید ، هونه‌رمه‌ند ( ئازاد سه‌عید) ئاماژه به‌ڕۆڵ و توانای هونه‌ری جه‌لال سه‌عید ده‌دات كاتێك كه له‌تیپی هونه‌ری میللی هه‌ولێر دابووه ( زۆربه‌ی تابلۆكانی سه‌ماو هه‌ڵپه‌ڕكێ له‌تیپی هونه‌ری میللی نه‌ته‌وه‌یی هه‌ولێر ، به‌ده‌نگی جه‌لال سه‌عید تۆماركراوه، لێزانانه‌و شاره‌زاییانه تابلۆكانی پڕجۆش و خرۆشتر ده‌كرد، وای لێهاتبوو ئه‌گه‌ر تابلۆ هونه‌رییه‌كان به‌ده‌نگی ئه‌و تۆمارنه‌كرابا ، هه‌ستت ده‌كرد كه‌م و كوڕی تیایه و تام و چێژی لێ نه‌ده‌بینرا، خزمه‌تی گه‌وره و به‌رچاوی به‌گۆرانی و تیپی هونه‌ری میللی نه‌ته‌وه‌یی هه‌ولێر كردووه، جێ په‌نجه‌ی جه‌لال سه‌عید دیاره له‌ڕه‌وتی پێشووه‌چون و سه‌ركه‌وتنی تیپه‌كه، هه‌رله‌به‌ر ئه‌وه‌ی به‌ده‌نگه زوڵاڵه‌كه‌ی به‌شداری له‌زۆربه‌ی تابلۆكاندا كردووه و ، ده‌وری كاریگه‌ری هه‌بووه ته‌نانه‌ت زۆرجار تیپه‌كه به‌تیپی جه‌لال سه‌عید ده‌ناسرا ، واته خه‌ڵك ده‌یانگوت تیپه‌كه‌ی جه‌لال سه‌عید، هونه‌رمه‌ندێكی تابڵێی قسه‌خۆش و كه‌سایه‌تییه‌كی دیار و پڕ هه‌ڵوێستی جوان و سه‌نگین بوو) (6).
هونه‌رمه‌ند له‌ساڵی (1981) چه‌ند به‌رهه‌مێكی هونه‌ری تۆمارده‌كات ، دیارترینیان گۆرانی ( تۆی نازه‌نین ) بووه ، له‌ساڵی (1983) كاسێتێك كه پێهاتووه له (10) تراك، به‌هاوكاری هونه‌رمه‌ندی ژه‌نیار و ده‌نگخۆش ( قادری سه‌یاحی ) تۆمارده‌كات.
جه‌لال سه‌عیدی هونه‌رمه‌ند ، به‌رده‌وام بووه له‌كار و چالاكی هونه‌ری ، له‌نێو ئاهه‌نگ و بۆنه‌كان و شه‌و دانیشته‌كاندا به‌ده‌نگه خۆشه‌كه‌ی چه‌ندین به‌رهه‌می تۆماركردووه و ئه‌مڕۆ له‌خانه‌ی ئه‌رشیفی هونه‌ری مۆسیقا و گۆرانیدا وه‌ك سامانێكی به‌رز و لێوان لێو له‌هونه‌ری ڕه‌سه‌نی میللی چاوی لێده‌كرێت، ئه‌و ده‌نگ و هونه‌ره‌یه به‌شێوازی گه‌رووی جه‌لال سه‌عید، كه ئه‌مڕۆ هه‌وادارێكی زۆر به‌تاسه‌وه گوێ له‌به‌رهه‌مه‌كانی ده‌گرن.
له‌ماوه‌ی ژیانی هونه‌ریدا جه‌لال سه‌عید له‌گه‌ڵ زۆر له‌هونه‌رمه‌ندانی گۆرانیبێژ له‌شار و شارۆچكه‌كانی كوردستان پێكه‌وه ده‌نگیان ئاوێته‌ی یه‌كتری كردووه و له‌وبواره‌شدا جه‌لال سه‌عید خاوه‌نی ده‌یان له‌و دانیشتن و ئاهه‌نگانه‌یه ،
هونه‌رمه‌ند له‌گه‌ڵ ئه‌م هونه‌رمه‌ندانه پێكه‌وه گۆرانییان خوێندووه( كه‌ریم خه‌مزه‌یی ، ئاوات ئامه قه‌ره‌ج ، فه‌رهاد زیره‌ك و مه‌حمود محه‌مه‌د و ...تاد) بۆئه‌و مه‌به‌سته پێوه‌ندیم كرد به‌هونه‌رمه‌ندی ده‌نگخۆش و ده‌نگ زوڵاڵ ( مه‌حمود محه‌مه‌د) سه‌باره‌ت به‌كه‌سایه‌تی و هونه‌ری جه‌لال سه‌عید ، پێی ڕاگه‌یاندم ( هونه‌رمه‌ندی كۆچكردوو جه‌لال سه‌عید ، براو هاوڕێی دێرینم ڕۆحی شاد بێت، تابڵیی خاوه‌نی كه‌سایه‌تیه‌كی جوان و ڕۆح شیرین و گونجاو و دڵسۆز بۆ هاوڕێ و براده‌كانی و هونه‌ره‌كه‌ی ، ماوه‌یه‌كی زۆر له‌ئاهه‌نگ و شه‌ودانیشتن و تۆماركردنی كاسێتدا پێكه‌وه گۆرانیمان تۆماركردووه، هه‌میشه به‌حورمه‌ته‌وه له‌هونه‌ره‌كه‌ی ده‌ڕوانی ، خاوه‌نی نه‌فسیه‌تێكی زۆربه‌رزبوو، زۆر شاره‌زا بوو له‌چڕینی مه‌قامه‌كاندا ، هیچ كات له‌كاتی گۆرانی گوتندا دانه‌ده‌ما بۆ وشه ، به‌رده‌وام ده‌تووت كانییه‌كی سازگاره‌و وشه‌ی لێهه‌ڵئه‌ێنجێ ، من وه‌ك خۆم زۆر خۆش حاڵ ده‌بووم كه به‌یه‌كه‌وه گۆرانیمان ده‌گووت ، ده‌نگی خۆش و شێوازی چڕینه‌كه‌ی نه‌شئه‌ی زیاتری ده‌دا به‌من) (7) .
هونه‌رمه‌ند له‌ساڵی (1992) هاوژینه‌كه‌ی كۆچی دوایی ده‌كات ، به‌وڕووداوه كاریگه‌ری له‌سه‌ر هه‌ست و هونه‌ره‌كه‌ی داده‌نێت ، دوای دووساڵ ، (1994) له‌گه‌ڵ خاتوو ( شلێر فه‌تاح ) ژیانی هاوسه‌ری پێكدێنێته‌وه و ، ده‌بنه خاوه‌نی دوو منداڵی تر ،
جیا له‌و به‌رهه‌مه تۆماركراوانه‌ی له ته‌له‌فزیۆن و ئاهه‌نگ و دانیشتنه هونه‌ره میللییه‌كان ، جه‌لال سه‌عید له‌ساڵی (1980) له‌گه‌ڵ تیپی هونه‌ره میللییه‌كان گه‌شتی بۆده‌ره‌وه‌ی وڵات كردووه و به‌شداری فیستڤاڵه‌كانی كردووه له وڵاتانی ( ئه‌ڵمانیای ڕۆژهه‌ڵات و ڕۆژئاوا ، ڕوسیا ، چیكۆسلۆڤاكیا ، پۆڵۆنیا و یۆنان )، له‌دوای ڕاپه‌ڕینه‌وه به‌هه‌موو توانا و هونه‌ره دڵگیره‌كه‌یه‌وه به‌شداری ئاهه‌نگ و بۆنه نیشتمانی و نه‌ته‌وه‌ییه‌كان كردووه و هه‌روه‌ها له‌چه‌ندین به‌رنامه‌ی ته‌له‌فزیۆنی بۆكه‌ناڵه ئاسمانیه‌كان و لۆكاڵییه‌كان به‌هونه‌ره‌كه‌ی بوونی خۆی سه‌لماندووه.
جه‌لال سه‌عید زیاتر به به‌سته خۆشه‌كانی ناسراوه به‌ڵام زۆر خولیاو ئاشنای مه‌قام بووه و له‌به‌رهه‌مه‌كانیدا مه‌قامی چڕیوه، به‌رهه‌مه هونه‌رییه‌كانی كه‌له‌نێوه‌ندی هونه‌ریدا دیارن و هه‌واداران و بیسه‌رانی ده‌نگ و هونه‌ره‌كه‌ی به‌په‌رۆشه‌وه گوێی لێده‌گرن، هونه‌رمه‌ند زۆربه‌ی به‌رهه‌مه‌كانی فۆلكلۆرن و خاوه‌نی زیاتر له (100) ئاوازه كه‌بۆبه‌رهه‌مه‌كانی خۆی داناوه ، به‌ڵام سوودی له‌هۆنراوه‌ی شاعیرانی وه‌ك ( هه‌ژار ، هێمن ، خه‌یام ، نالی ، وه‌فایی ، وه‌لی دێوانه ،عه‌بدوڵڵا په‌شێو ، عه‌بدولڕه‌حمان بێلاف ، ڕۆسته‌م باجه‌لان، ئه‌كره‌م خامۆش ، جه‌بار حه‌بیب و حه‌مه سه‌عید ئیبراهیم ) به‌شێك له‌گۆرانی و مه‌قامه‌كانی هونه‌رمه‌ند ،
1/ ساقی له‌باده
2/ چاوجوان
3/ بۆچی ده‌ڕۆیی به‌جێم دێڵی
4/ ئه‌ی وه‌ی گه‌وره كچ
5/ په‌روانه ( په‌روانه‌ی سووتاو په‌شێو حاڵ منم
وه‌ك قه‌قنه‌س سووتاو كۆی زوخاڵ منم )
6/ چاوی ڕه‌شی جوانه
7/ بڕوات بێ نازداره‌كه‌م
8/ بۆچی ده‌گری ده‌ناڵێنی
9 / من به‌دێوانه
10/ گه‌رده‌لوولی ناخی دڵ
11/ زه‌وی و ئاسمان ( مه‌قام)
12/ له‌داخی مه‌ینه‌تی ( مه‌قام)
13/ ساقی وه‌ره ( مه‌قام)
14/ شێخی سه‌نعان ( مه‌قام)
15/ قه‌تاره‌ی ژان
16/ لانه‌ی شێواو
17/ نه‌مزانی
18/ شه‌و له‌گریانم ده‌كا
19/ كیژی لادێ
20/ ته‌مه‌ن به‌ره‌و هه‌ڵكشانه
( ته‌مه‌ن به‌ره‌و هه‌ڵكشانه ، هه‌رئاخ و خه‌فه‌ت و ژانه
چی تیا ماوه ئه‌م ژیانه ، جگه له‌باده‌ی شه‌وانه ) هۆنراوه‌ی ( حه‌مه‌سه‌عید ئیبراهیم و ئاوازی ڕه‌مه‌زان حسێن) .
21/ ڕێگای قیامه‌ت ( ئایینی) .
نووسه‌ر و پێشكه‌شكار و بێژه‌ری ته‌له‌فزیۆنی كه‌ركوك ( هاشم جه‌باری) له‌كتێبه‌كه‌یدا ئاماژه به ( 13) گۆرانی هونه‌رمه‌ند جه‌لال سه‌عیدی داوه كه‌له‌ته‌له‌فزیۆنی كه‌ركوك په‌خشكراون (8).
ئه‌م ئه‌ستێره گه‌شاوه‌ی ئاسمانی هونه‌ری گۆرانی میللی جه‌لال سه‌عید ، دووچاری نه‌خۆشیی ( شێرپه‌نجه‌ی پرۆستات) ده‌بێت و ماوه‌ی (5) ساڵ به‌و نه‌خۆشییه كوشنده‌یه‌وه ده‌ناڵێنێ و دووجار نه‌شته‌رگه‌ری له‌شاری هه‌ولێر و له‌وڵاتی توركیا بۆئه‌نجام ده‌درێت، مه‌خابن ئه‌و هونه‌رمه‌نده باڵابه‌رزه ده‌نگخۆشه ڕه‌سه‌نه له‌ته‌مه‌نی (60) ساڵیدا ، له‌شه‌وی (9 له‌سه‌ر 10/12/2013) خۆری ته‌مه‌نی ئاواده‌بێت و بۆهه‌میشه چاوه‌كانی لێك ده‌نێ و ماڵئاوایی ، له‌قه‌ڵاو مناره و گه‌ڕه‌كه‌كانی ته‌یراوا و سه‌یداو ، خانه‌واده‌و هونه‌رمه‌ندان ده‌كات ، له‌ڕێكه‌وتی (10/12/2013) به‌ئاماده‌بوونی جه‌ماوه‌رێكی زۆری شاری هه‌ولێر له‌مه‌راسیمێكی شایسته به مێژووی هونه‌ر و كه‌سایه‌تی جه‌لال سه‌عید له گۆڕستانی ( شێخ ئه‌حمه‌د) ئه‌سپه‌رده‌ی خاكی پیرۆزی كوردستانی ده‌كه‌ن ، یاد و یاده‌وه‌رییه‌كانی هه‌موو كات به‌رزو به‌ڕێز بێت ، ده‌نگ و هونه‌ری جه‌لال سه‌عید هه‌میشه به‌شكۆداری و پیرۆزی ده‌مێنێته‌وه.
جه‌مالی ده‌لاك 8/2/2022 هه‌ولێر .
سه‌رچاوه :
(1 و 5) كتێبی ژیان و هونه‌ر ، كۆكردنه‌وه‌و ئاماده‌كردن و ساغكردنه‌وه‌ی ، تاهیر كرمانج ، هه‌ولێر 2017 ، لاپه‌ڕه ( 312).
(2 و 3 و 4) گۆڤاری هه‌رێمی كوردستان ، دیدار له‌گه‌ڵ هونه‌رمه‌ند جه‌لال سه‌عید ، ژماره ( 544) له 16/2/2010
(6) په‌یوه‌ندی ته‌له‌فۆنی له‌گه‌ڵ هونه‌رمه‌ند ( ئازاد سه‌عید) پسپۆرو ڕاهێنه‌ری تیپی هونه‌ری میللی سلێمانی ، ڕۆژی دووشه‌ممه ڕێكه‌وتی (7/2/2022)
(7) پێوه‌ندی ته‌له‌فۆنی له‌گه‌ڵ هونه‌رمه‌ند مه‌حمود محه‌مه‌د ، ڕۆژی دووشه‌ممه ڕێكه‌وتی (7/2/2022)
(8) كتێبی مێژووی ته‌له‌فزیۆنی كه‌ركوك (1967_ 1999) هاشم جه‌باری ، لاپه‌ڕه (71).
به‌پێویستی ده‌زانم كه سوپاسێكی بێ پایان ئاراسته‌ی هاوڕێی هونه‌رمه‌ند ، نوسه‌ر و هونه‌ردۆست ( تاهیر كرمانج ) بكه‌م ، له‌ڕێی په‌یوه‌ندی ته‌له‌فۆنیه‌وه، به‌زانیارییه‌كانی هاوكاری كردووم ( ج،د) .
کۆمێنت (0)
تا ئێستا هیچ کۆمێنتێک نەکراوە.