ئه‌نجوومه‌نی وه‌زیرانی عێراق ئه‌مڕۆ سێشه‌م بڕیاری دا هه‌موو ئه‌و خۆپیشانده‌ر و هاووڵاتییانه‌ی له ڕووداوه‌كانی ئه‌م دواییه‌ی ناوچه‌ی سه‌وزی به‌غدا كوژران، به شه‌هید هه‌ژمار بكرێن و قه‌ره‌بوو بكرێنه‌وه.
حه‌سه‌ن نازم گوته‌بێژی ئه‌نجوومه‌نی وه‌زیرانی عێراق له كۆنگره‌ی ڕۆژنامه‌وانی هه‌فتانه‌یدا ڕایگه‌یاند: سه‌رۆك وه‌زیرانی عێراق هه‌موو هه‌وڵێك ده‌دات خۆپیشاندان و ڕووداوه‌كانی ئه‌م دواییه‌ی عێراق دووباره نه‌بنه‌وه.
ڕاشیگه‌یاند: ئه‌نجوومه‌نی وه‌زیران بڕیاری دا سه‌رجه‌م ئه‌و كه‌سانه‌ی له ڕووداوه‌كانی ئه‌م دواییه‌ی شاری به‌غدا كوژران، به شه‌هید هه‌ژمار بكرێن و قه‌ره‌بوو بكرێنه‌وه.
هه‌روه‌ها ڕایگه‌یاند: بۆ ئه‌و كه‌سانه‌ش كه بریندار بوون، هه‌وڵ ده‌درێ به‌ر یاسای قه‌ره‌بووكردنه‌وه‌ی زیانلێكه‌وتووان بكه‌ون.
جێی باشه ڕۆژانی 29 و 30ی مانگی ڕابردوو له ناوچه‌ی سه‌وزی به‌غدا خۆپیشانده‌ران دوای بڕیاری دووركه‌وتنه‌وه‌ی موقته‌دا سه‌در ڕێبه‌ری ڕه‌وتی سه‌در له كاری سیاسی، به‌شێوه‌یه‌كی به‌ربڵاو ڕژانه ناوچه‌ی سه‌وز و هه‌روه‌ها فه‌رمانگه‌كانی حكوومه‌ت و به‌مه‌ش ڕووبه‌ڕووبوونه‌وه له‌نێوان هێزه ئه‌منییه‌كان و چه‌ند لایه‌نێكی سیاسی ڕووی دا و كوژرا و برینداری لێ كه‌وته‌وه.
کۆمێنت (0)
تا ئێستا هیچ کۆمێنتێک نەکراوە.