جێگری وەزیری دەرەوەی ئەمریکا ئەمڕۆ هەینی 09ـی 09ـی 2022 ڕایگەیاند، ئەمریکا پشتیوانی یاسایەکی نیشتیمانی تایبەت بە نەوت و گازی عێراق دەکات.
باربارا لیڤ جێگری وەزیری دەرەوەی ئەمریکا ڕایگەیاند: پشتیوانیی ویلایەتە یەکگرتووەکانی ئەمریکای بۆ سەروەری و سەقامگیری و ئاساییشی عێراق، یاسایەکی نیشتیمانی تایبەت بە نەوت و گاز و ڕێکەوتنی سیاسی و هەموو ئەمانەش بە پشتبەستن بە سازشکردن و دیالۆگی مانادار دووپات کردەوە.
ڕاشیگەیاند: هانی هاووڵاتییانی عێراقی و لەو نێوەندەشدا خەڵکی هەرێمی کوردستان دەدەین کە هەر دەرفەتێک دروستبوو دەنگ بدەن و ڕایگەیاند ئەمە باشترین ڕێگەیە بۆ هاووڵاتییان تا کۆنتڕۆڵی حکوومەتەکەی خۆیان بکەن.
ئەمە لەکاتێکدایە کە جێگری وەزیری دەرەوەی ئەمریکا لە سەردانێکی بۆ هەرێمی کوردستان لەگەڵ سەرۆک مەسعود بارزانی کۆبووەوە و سڵاوی سەرۆک بایدنی بە سەرۆک بارزانی گەیاند و ئاماژەی بەوە دا كە سەرۆک بایدن بە بایەخێكی زۆرەوە سەیری هەرێمی كوردستان دەكات و هەرێمی كوردستانیش یەكێكە لە ئەولەوییەتەكانی سیاسەتی دەرەكیی وڵاتەكەی و جەختیشی لەوە كردەوە كە سەروەری و سەقامگیریی هەرێمی كوردستان و عێراق، بناخەیە بۆ سەقامگیری و پێشكەوتنی ناوچەكە.
کۆمێنت (0)
تا ئێستا هیچ کۆمێنتێک نەکراوە.