ده‌سته‌ی پیشه‌سازی سه‌ربازی عێراق ئه‌مڕۆ یه‌كشه‌م ئاشكرای كرد كه له ماوه‌یه‌كی كورتی داهاتوودا ده‌ست ده‌كه‌ن به دروستكردن و به‌رهه‌مهێنانی جۆره تفه‌نگێكی نوێ به‌ناوی (رافیده‌ین).
محه‌مه‌د ساحب ده‌ڕاجی سه‌رۆكی ده‌سته‌ی پیشه‌سازی سه‌ربازی عێراق ڕایگه‌یاند: ئه‌ركی ئێمه وه‌ك پیشه‌سازی سه‌ربازی ئه‌وه‌یه كه بره‌و به پیشه‌سازی سه‌ربازی ناوخۆیی بده‌ین و هه‌روه‌ها ئاسایشی ئابووری وڵات و ئاسایشی نیشتمانی به به‌رهه‌مهێنانی چه‌ك و ته‌قه‌مه‌نی له‌ناوخۆی عێراق، بپارێزین.
ڕاشیگه‌یاند: كاری داهاتوومان بریتییه له دروستكردنی تفه‌نگی ڕافیده‌ین.
به‌پێی زانیارییه‌كان تفه‌نگی ڕافیده‌ین چه‌كێكی مامناوه‌ندییه و هاوشێوه‌ی كلاشینكۆفه له قه‌باره و شێوه‌یدا.
محه‌مه‌د ساحب ده‌ڕاجی ئاماژه‌ی به‌وه‌ش دا كه جگه له دروستكردنی تفه‌نگی رافیده‌ین، له كۆتایی ئه‌مساڵه كار له‌سه‌ر پێشخستن و به‌رهه‌مهێنانی ته‌قه‌مه‌نی سووكیش ده‌كه‌ن بۆ ئه‌وه‌ی له‌لایه‌ن هێزه ئه‌منی و چه‌كداره‌كان له ناوخۆی وڵات به‌كاربهێنرێ.
سه‌رۆكی ده‌سته‌ی پیشه‌سازی سه‌ربازی جه‌ختیشی كرده‌وه كه به‌داخه‌وه داموده‌زگا سه‌ربازییه‌كانی ناوخۆی عێراق وه‌ك پێویست به پیل كڕینی چه‌كی ناوخۆیی تایبه‌ت به ده‌سته‌كه‌یان نایه‌ن و پێویسته ئه‌مه په‌ره‌ی پێ بدرێ بۆ پێشخستنی كاره‌كانمان.
جێی باسه ماوه‌یه‌ك پێش ئێسته ده‌سته‌ی پیشه‌سازی سه‌ربازی عێراق دروستكردنی یه‌كه‌م چه‌كی ده‌مانچه‌ی ڕاگه‌یاندبوو و ناوی نابوو بابل.
کۆمێنت (0)
تا ئێستا هیچ کۆمێنتێک نەکراوە.