كه‌سێك به‌تۆمه‌تی ته‌قه‌كردن له‌ هاووڵاتییه‌ك ده‌ستگیركرا

مەفرەزەكانی بنكەی پۆلیسی چوارچرا تۆمەتبارێكیان دەستگیركرد كە تەقەی لە هاوڵاتییەك كردبوو .
ئه‌مڕۆ دووشه‌ممه‌ 12 ى 9 ى 2022، له‌راگه‌یاندراوێكدا پۆلیسی سلێمانی بڵاویكرده‌وه‌: دوای ئەوەی فەرمانێكی دەستگیركردن لە دادگای لێكۆڵینەوەی كەلارەوە گەیشتە بەڕێوەبەرایەتی پۆلیسی پارێزگای سلێمانی كە تۆمەتبارێك لەقەزای كەلار تەقەی لەهاوڵاتییەك  كردووەو هەڵاتووە ، گومانیان دەكرد بەرەو شاری سلێمانی هاتبێت  ، دەستبەجێ‌ بەڕێز بەڕێوەبەری پۆلیسی پارێزگای سلێمانی سەرجەم بنكەكانی ڕاسپارد كە لێكۆڵینەوەو بەدواداچوونی بەپەلە بكەن بۆ دۆزینەوەو دەستگیركردنی  تۆمەتبار .
پۆلیسی سلێمانی ئاماژه‌ به‌وه‌شده‌كات، سەرەنجام توانرا  لەلایەن بنكەی پۆلیسی چوارچراوە تۆمەتباری هەڵاتوو  دەستگیربكرێت و دەستیش بگیرێت بەسەر ئۆتۆمبێلێكدا كە بەتۆمەتبار بووە .
پۆلیسی سڵێمانی ئه‌وه‌شی خستووه‌ته‌ ڕوو، لەئێستادا تۆمەتبار (د، ق، أ ) بەبڕیاری دادوەرو بەپێی ماددەی 406/31 ڕاگیراوەو تۆمەتبارە بە تەقەكردن لە هاوڵاتییەك لە قەزای كەلار ، دوای تەواوكردنی ڕێكارە یاساییەكان تۆمەتبار ڕەوانەی دادگای لێكۆڵینەوەی كەلار دەكرێتەوە .