زیانی ئاگره‌كه‌ی عه‌لوه‌ی سلێمانی زیاتر له‌ ملیۆنێك دۆلاره‌

به‌هۆی ئاگره‌كه‌ی ئه‌مشه‌وی عه‌لوه‌ی شاری سلێمانی چوار دووكان و چوار بارهه‌ڵگر سووتاون و زیانه‌كانیش به‌ زیاتر له‌ ملیۆنێك دۆلار ده‌خه‌ملێنرێن.

عه‌تا محه‌مه‌د لێپرسراوی كاسبكارانی عه‌لووه‌ی سلێمانی بۆ (كوردستان تیڤی) ڕایگه‌یاند: له‌ سه‌رله‌ئێواره‌ی ئه‌مڕۆ دووشه‌مه‌وه‌ ئاگرێكی گه‌وره‌ له‌ بازاڕی عه‌لوه‌ی شاری سلێمانی كه‌وتۆته‌وه‌.

ڕاشیگه‌یاند: به‌هۆی ئاگره‌كه‌ چوار به‌شی تایبه‌ت له‌نێو عه‌لوه‌ سووتاون و هه‌روه‌ها چوار بارهه‌ڵگریش گڕیان گرتووه‌.

هه‌روه‌ها ڕایگه‌یاند: به‌گوێره‌ی زانیارییه‌ سه‌ره‌تاییه‌كان زیانی ئاگره‌كه‌ زیاتر له‌ ملیۆنێك دۆلاره‌ كه‌ زیان به‌ر چه‌ندین به‌ش و كۆگای ناو عه‌لوه‌كه‌ كه‌وتووه‌.

ئاماژه‌ی به‌وه‌ش دا كه‌ تیمه‌كانی به‌رگریی شارستانی سلێمانی سه‌رقاڵی كۆنتڕۆڵكردنی ئاگره‌كه‌ن و تا ئێستاش هۆكاری كه‌وتنه‌وه‌ی ئاگره‌كه‌ دیار و ڕوون نییه‌.