پارێزگاری هەولێر لەمیانی پێشوازی لە ژمارەیەک قوتابى کورد کرد کە لە دەرەوەی وڵات لەدایکبوونە، ڕایگەیاند، هەولێرى پایتەخت، بۆتە شوێنى لەباوەشگرتن و خزمەتکردنى مرۆڤایەتى و پەناگەیەک بۆ لێقەوماوان.
ئەمڕۆ سێشەممە 13ـی 09ـی 2022، ئومێد خۆشناو پارێزگاری هەولێر، لەدیوانی پارێزگا، پێشوازی لە ژمارەیەک قوتابى کورد کرد، کە لە دەرەوەی وڵات لەدایکبوونە و لەزانکۆکانى ئەڵمانیا و نەمسا و چەند وڵاتێکى ترى ئەوروپى دەخوێنن و بە مەبەستى لە نزیکەوە ئاشنابوون بوو بە کار و چالاکییە مرۆییەکان و پڕۆسەی خوێندن و پەروەردە بە شێوەیەکی گشتیی سەردانى هەولێرى پایتەختى هەرێمی کوردستانیان کردووە.
لەیدارەکەدا پارێزگاری هەولێر، باسى لە بەرنامەی کار و پلانی پارێزگا کرد بۆ ئەنجامدانى کارە مرۆییەکان و خزمەتکردنى هاووڵاتییان و گەیاندنى پڕۆژەخزمەتگوزاییەکان لە سێکتەرە جیاجیاکان، هەروەها تیشکى خستەسەر ڕەوشی ئاوارە و پەنابەران بە شێوەیەکى گشتیى لە هەرێمى کوردستان و پوختەیەکى لە بارەى دوایین پەرەسەندنەکانى ڕەوشى ژیانیان و پێشکەشکردنی ئەو هاوکاری و یارمەتی و خزمەتەى کە حکوومەتى هەرێم و پارێزگاى هەولێر پێشکەشی کردوون لە دابینکردنی پێداویستی و چارەسەرکردنی کێشە و گرفتەکانیان.
ئومێد خۆشناو ڕایگەیاند: سەرەڕای سەختى دۆخى دارایی و کێشەکانمان لەگەڵ بەغدا، بەڵام لەڕووى مرۆیی و هاوکاریکردنى پەنابەران و لێقەوماوان، هەرێمى کوردستان بەگشتیى و هەولێرى پایتەخت بەتایبەتى بۆتە شوێنى لەباوەشگرتن و خزمەتکردنى مرۆڤایەتى و پەناگەیەک بۆ لێقەوماوان.
پارێزگارى هەولێر، ئاماژەی بە ڕۆڵی زانکۆ و پەیمانگە و ناوەندە ئەکادیمی و زانستیەکاندا لە پێشختن و بەرەوپێشبردنى کۆمەڵگەدا و ئەرکی قوتابییانی وەک توێژێکی کارا لەو پرسەدا بە پێویست زانى و هیوای سەرکەوتنی بۆ قوتابییەکان خواست.
لەلایەن خۆیانەوە قوتابییان وێڕاى ئەوەى سوپاسى پارێزگارى هەولێریان کرد بۆ ئەو پیشوازییەى کە لێیانکرا، خۆشحاڵى خۆیان بەو پێشکەوتنە نیشاندا کە هەولێرى پایتەخت بەخۆیەوە بینیویەتى.
کۆمێنت (0)
تا ئێستا هیچ کۆمێنتێک نەکراوە.