رۆجه‌ر فیدڕه‌ری یاریزانی پیشه‌رگه‌ری سویسڕی له یاریی تێنسی سه‌رزه‌وی ئه‌مڕۆ پێنجشه‌م له ته‌مه‌نی 41 ساڵیدا وازهێنانی یه‌كجاری له یاریكردن ڕاگه‌یاند.
فیدڕه‌ر بۆ هانده‌ران گوتی: ده‌مه‌وێ به هه‌موو هه‌واداران ڕاده‌گه‌یه‌نم كه به‌هۆی پێكانی به‌رده‌وام و ئه‌نجامدانی نه‌شته‌رگه‌رییه‌وه له ماوه‌ی سێ ساڵی ڕابردوودا هه‌وڵێكی زۆرم دا بگه‌ڕێمه‌وه ئاستی جاران و نێو ڕكابه‌رییه‌كان، به‌ڵام ده‌بێت دان به‌وه‌دا بنێم كه توانای جه‌سته‌ییم سنووری هه‌یه.
ڕاشیگه‌یاند: ته‌مه‌نی ئێستام 41 ساڵه و له ماوه‌ی 24 ساڵی ڕابردوودا زیاتر له 1500 یاریم ئه‌نجامداوه، ئێستاش كاتی ئه‌وه‌یه كۆتاهاتنی ژیانی وه‌رزشیم وه‌ك تێنسكار ڕابگه‌یه‌نم.
هه‌روه‌ها ڕایگه‌یاند: كۆتا یاریكردنم له هه‌فته‌ی داهاتوو ده‌بێت له پاڵه‌وانییه‌تی جامی لاڤه‌ر له له‌نده‌نی پایته‌ختی به‌ریتانیا و دوای ئه‌مه به‌یه‌كجاری له یاریی تێنس دوور ده‌كه‌ومه‌وه.
جێی باسه فیدڕه‌ر له‌گه‌ڵ هه‌ریه‌ك له ڕكابه‌ره‌كانی رافایێل نادالی ئیسپانی و نۆڤا دیۆكۆڤیچی سڕبی له ماوه‌ی 20 ساڵی رابڕدوودا له‌سه‌ر ئاستی جیهان به ته‌واوی یاری تێنسی سه‌رزه‌وییان كۆنتڕۆڵ كردوه و براوه‌ی زۆرینه‌ی پاڵه‌وانیه‌تییه جیهانییه‌كان بوون.
کۆمێنت (0)
تا ئێستا هیچ کۆمێنتێک نەکراوە.