به‌ڕێوه‌به‌رایه‌تی گشتیی پۆلیسی پارێزگای دهۆك ئاشكرای كرد كه توانیویانه بكوژی عه‌قید سابڕ جومعه ئاكره‌یی ده‌ستگیر بكه‌ن.
هێمن سلێمان گوته‌بێژی پۆلیسی پارێزگای دهۆك ڕایگه‌یاند: كه‌مێك پێش ئێستا پۆلیسی ئاكرێ توانی بكوژی عه‌قید سابڕ جومعه ده‌ستگیر بكات.
ڕاشیگه‌یاند: ئێستا بكوژه‌كه به‌پێی مادده‌ی 406 له یاسای سزادانی عێراقی ڕاگیراوه و لێكۆڵینه‌وه‌ی له‌گه‌ڵ ده‌كرێ.
غه‌فاڕ ته‌یب په‌یامنێری (كوردستان تیڤی) ڕایگه‌یاندبوو: سه‌رله‌ئێواره‌ی ئه‌مڕۆ پێنجشه‌م له‌لایه‌ن كه‌سێكه‌وه ته‌قه له ئۆتۆمبێڵێك كراوه و به‌هۆیه‌وه سێ كه‌س بوونه‌ته قوربانی.
ڕاشیگه‌یاندبوو: به‌هۆی ته‌قه‌كان هاووڵاتییه‌ك به‌ناوی (سابڕ جومعه) كه پله‌ی عه‌قیدی سه‌ربازی له وه‌زاره‌تی پێشمه‌رگه هه‌یه و خاوه‌نی 5 منداڵه و خه‌ڵكی ئاكرێیه، ڕاسته‌وخۆ له‌نێو ئۆتۆمبێڵه‌كه گیانی له‌ده‌ستاوه.
په‌یامنێرمان هه‌روه‌ها گوتبووی: دوای گواستنه‌وه‌ی بۆ نه‌خۆشخانه، هه‌روه‌ها كچه‌كه‌ی عه‌قید سابڕ به‌هۆی سه‌ختی برینه‌كه‌یه‌وه گیانی له‌ده‌ست دا.
ئاماژه‌ی به‌وه‌ش دابوو كه هاوژینه‌كه‌شی بارودۆخی ته‌ندروستی ناجێگیره و ئێستا له نه‌خۆشخانه چاره‌سه‌ری ته‌ندروستی بۆ ئه‌نجام ده‌درێ.
وێنه: عه‌قید سابڕ جومعه كه له ڕووداوی ته‌قه‌كردنه‌كه‌ی ئه‌مشه‌و هاته كوشتن
کۆمێنت (0)
تا ئێستا هیچ کۆمێنتێک نەکراوە.