به‌ڕێوه‌به‌رایه‌تی پۆلیسی پارێزگای هه‌ڵه‌بجه ئاشكرای كرد كه ئێواره‌ی ئه‌مڕۆ پێنجشه‌م منداڵێكی ته‌مه‌ن یه‌ك ساڵ ئۆتۆمبێڵ لێی دا و به‌هۆیه‌وه گیانی له‌ده‌ست دا.
مقه‌ده‌م بارزان عوسمان گوته‌بێژی پۆلیسی هه‌ڵه‌بجه ڕایگه‌یاند: ئیوارەی ئەمڕۆ پێنجشه‌م لە گەڕەکی مۆردانەی پارێزگای هەڵەبجە، منداڵێکی کوڕی تەمەن یەک ساڵ بە ناوی (محه‌مه‌د بڕیار ئازاد) ئۆتۆمبێلێک دەیشێلێت و برینداری دەکات.
ڕاشیگه‌یاند: منداڵه‌كه دوای گەیاندنی بۆ نەخۆشخانەی فریاکەوتنی هەڵەبجە، بەهۆی سەختی برینەکەیه‌وه گیانی لەدەست دا.
مقه‌ده‌م بارزان عوسمان ئاماژه‌ی به‌وه‌ش دا: دۆسییەی لێکۆڵینەوە بۆ ڕووداوەکە لە بنکەی پۆلیسی هەڵەبجە ڕێکخراوە و شوفێره‌كه بە پێ ماددەی 24ی هاتوچۆ ده‌ستگیر کراوه و دەست بەسەر ئۆتۆمبێلەکەشی گیراوه.
کۆمێنت (0)
تا ئێستا هیچ کۆمێنتێک نەکراوە.