به‌ڕێوه‌به‌ری دامه‌زراوه‌یه‌كی تۆژینه‌وه و ڕاوێژكاری هۆشداری توندی دا كه ئه‌گه‌ر حكوومه‌ت له سیاسه‌ت و پلانی ئێستای به‌رامبه‌ر به ڕووبه‌ڕووبوونه‌وه‌ی وشكه‌ساڵی و فه‌رامۆشكردن به‌رده‌وام بێت، ئه‌وا له داهاتوویه‌كی نزیكدا نیوه‌ی خاكی عێراق ده‌بێته بیابان.
مه‌نار عوبێدی به‌ڕێوه‌به‌ری دامه‌زراوه‌ی داهاتووی عێراق بۆ تۆژینه‌وه و ڕاوێژكاری ڕایگه‌یاند: وه‌زاره‌تی كشتوكاڵ و سه‌رچاوه‌كانی ئاو و هه‌روه‌ها سه‌رجه‌م دامه‌زراوه په‌یوه‌نداره‌كانی حكوومه‌ت تا ئێستا له سیاسه‌ت و پلانی ڕووبه‌ڕووبوونه‌وه‌ی وشكه‌ساڵی سه‌ركه‌وتوو نه‌بووه.
ڕاشیگه‌یاند: ڕێژه‌ی ئێستای به بیابانبوونی خاكی عێراق بریتییه 16%، هه‌روه‌ها ئه‌و زه‌وییانه‌شی كه مه‌ترسی بیابانبوونیان له‌سه‌ره زیاتر له 54%ه.
هه‌روه‌ها ڕایگه‌یاند: ئه‌م داتا و زانیارییانه له دیوانی چاودێری دارایی عێراق ده‌رچوونه كه داوای كردووه كاری به‌په‌له و ڕاسته‌وخۆ بكرێت و هه‌روه‌ها گۆڕانكاری له پلانی وه‌زاره‌تی كشتوكاڵ و سه‌رچاوه‌كانی ئاو سه‌باره‌ت به رووبه‌ڕووبوونه‌وه‌ی وشكه‌ساڵی بكرێ.
مه‌نار عوبێدی گوتیشی: به‌هۆی نه‌بوونی لێپرسینه‌وه و وردبینی هه‌میشه بابه‌ته گرینگ و چاره‌نووسسازه‌كانی په‌یوه‌ست به ژیانی هاووڵاتییان له‌نێو ئه‌رشیفی فایله‌كانی ده‌وڵه‌ت به‌جێ ده‌هێڵرێ و ته‌نانه‌ت هاووڵاتییان خۆشیان گرینگی پێ ناده‌ن و فه‌رامۆشی ده‌كه‌ن تا كار له‌كار ده‌ترازێ.
به‌ڕێوه‌به‌ری دامه‌زراوه‌ی داهاتووی عێراق بۆ تۆژینه‌وه و ڕاوێژكاری هیوای خواست كاری جدیتر له‌سه‌ر دیارده‌ی وشكه‌ساڵی بكرێت و هاووڵاتییان و ده‌زگاكانی ڕاگه‌یاندن و هه‌موولایه‌ك پاڵه‌په‌ستۆ بخه‌نه سه‌ر حكوومه‌ت و وه‌زاره‌ته‌كان بۆ ئه‌وه‌ی كارێك بكرێ نه‌وه‌ی داهاتووی عێراق له نیشتمانه‌كه‌ی به ئاسووده‌یی بژیت.
کۆمێنت (0)
تا ئێستا هیچ کۆمێنتێک نەکراوە.