پۆلیسی سلێمانی ئەمڕۆ هەینی 16ـی 09ـی 2022 ڕایگەیاند، تەقەکەری سەرەکی ڕووداوەکەی شەوی ڕابردووی شەقامی سالم دەستگیر کرا.
بەڕێوەبەرایەتی پۆلیسی سلێمانی ڕایگەیاند: مەفرەزەکانی بنکەی پۆلیسی ڕزگاری بە ھاوکاری بەشی پۆلیسی نەھێشتنی تاوان تەقەکەری سەرەکی ڕووداوەکەی شەوی ڕابردووی شەقامی سالم - سەھۆڵەکەیان دەستگیر کرد.
ڕاشیگەیاند: دوای ئەوەی شەوی ڕابردوو لەنێوان شۆفێری تەکسییەک و چەند کەسێکدا کە ماتۆڕسکیلیان پێ بوو شەڕ دروستبوو، شوفێری تەکسییەکە تەقەی کرد، دواتر ئەو کەسانەی ماتۆڕسکیلەکەیان پێ بووە بە دەمانچەی شۆفێری تەکسییەکە تەقەیان کرد و ھەڵاتن، دەستبەجێ ھێزەکانی پۆلیس گەیشتنە شوێنی ڕووداوەکە و لێکۆڵینەوەکان لە ڕووداوەکە دەستی پێ کرد.
ئەوەشی خستەڕوو کە "توانرا تەقەکەری سەرەکی ڕووداوەکە کە شۆفێری تەکسییەکەیە لەلایەن مەفرەزەکانی بنکەی پۆلیسی ڕزگاری بەھاوکاری بەشی پۆلیسی نەھێشتنی تاوان دەستگیر بکرێت و دەستیش بەسەر ئەو ئۆتۆمبێلەدا بگیرێت کە بە تۆمەتبار بووە.
پۆلیسی سلێمانی ئاماژەی بەوەش دا کە "تۆمەتبار (ش.ڕ.ع) لەدایکبووی 2001 بە بڕیاری دادوەر ڕاگیراوە و لێکۆڵینەوەکان بەردەوامە."
کۆمێنت (0)
تا ئێستا هیچ کۆمێنتێک نەکراوە.