ورده‌كاری ڕووداوی ئه‌و گه‌نجه‌ی ئه‌مڕۆ له‌ شاری كه‌ركووك هاته‌ كوشتن

دوای نیوه‌ڕۆی ئه‌مڕۆ چوارشه‌م له‌ شاری كه‌ركووك و له‌به‌رده‌م نه‌خۆشخانه‌ی ئازادی، گه‌نجێك ده‌سڕێژی گولـله‌ی لێ كرا و كوژرا.

هه‌ڵۆ جه‌باری په‌یامنێری (كوردستان تیڤی) ورده‌كاری ڕووداوه‌كه‌ی به‌مشێوه‌یه‌ خسته‌ڕوو: ئه‌و گه‌نجه‌ی كوژراوه‌ ناوی كارزان قادره‌ و ته‌مه‌نی 37 ساڵه‌ و دانیشتووی شارۆچكه‌ی چه‌مچه‌ماڵه‌.

گوتیشی: گه‌نجه‌كه‌ ئۆتۆمبێڵێكی ته‌كسی پێبووه‌ و ویستوویه‌تی بێته‌ نێو نه‌خۆشخانه‌ی ئازادییه‌وه‌ و له‌نێو ڕێڕه‌وی هاتنه‌ ژووره‌وه‌ی نه‌خۆشخانه‌، له‌لایه‌ن دوو كه‌سه‌وه‌ به‌ ده‌مانچه‌ ته‌قه‌ی لێ كراوه‌.

هه‌روه‌ها گوتیشی: ئه‌وانه‌ی ته‌قه‌یان لێ كردووه‌ دوو كه‌س بوونه‌ و هه‌ر سه‌رنشینی ئۆتۆمبێڵه‌كه‌ و له‌گه‌ڵ ئه‌و گه‌نجه‌ بوونه‌ كه‌ كوژراوه‌.

ئاماژه‌ی به‌وه‌ش دا: كوژراوه‌كه‌ چه‌ند فیشه‌كێكی به‌ركه‌وتووه‌ كه‌ هه‌موویان به‌ر سه‌ر و ملی كه‌وتوون و هه‌ر له‌نێو ئۆتۆمبێڵ ڕاسته‌وخۆ گیانی له‌ده‌ستداوه‌.

په‌یامنێرمان جه‌ختیشی كرده‌وه‌ بكوژه‌كان دوای ته‌قه‌كردن و كوشتنی گه‌نجه‌كه‌، به‌نێو گۆڕستانی گه‌ڕه‌كی شۆڕجه‌ ڕایان كردووه‌ و خۆیان ون كردووه‌.

هێزه‌ ئه‌منییه‌كانیش ده‌ستیان به‌ لێكۆڵینه‌وه‌كان كردووه‌ و ئێستا به‌دوای بكوژه‌كان ده‌گه‌ڕێن بۆ ئه‌وه‌ی ده‌ستگیریان بكه‌ن.