دهۆک؛ پازدەهەمین پێشانگه‌ها ترى و هنگڤینی دێ هێتەڤەکرن

بریارە دەمژمێر 12ێ نیڤرۆی رۆژا ئێکشەمبی رێکەفتی 2022/9/25 پازدەهەمین پێشانگه‌ها ترى و هنگڤینی بهێتە ڤەکرن.

ئەحمەد جەمیل رێڤەبەرێ گشتی یێ چاندنێ ل پارێزگەها دهۆکێ تایبەت ب کوردستان تیڤی راگەهاند، رۆژا ئێکشەمبی رێکەفتی 2022/9/25 لژێر چاڤدێرییا د. عەلی تەتەر پارێزگارێ دهۆکێ رێڤەبەرییا گشتی یا چاندنێ ل ناڤەندا فاملی مۆڵ - دهۆک دێ پازدەهەمین پێشانگەها تری و هنگڤینی ڤەکەت.

گۆت ژی، باشترین جۆرێن تری و هنگڤینی دناڤ ڤێ پێشانگەهەدا دێ هێنه‌ نیشادان، مەرەم ژڤێ ژی زێده‌تر پشتەڤانیكرنا جوتیارێن پارێزگه‌ها دهۆكێ یە.

ل پارێزگەها دهۆكێ‌ زێدەتر ژ 100 جۆرێن تری هەنە و دناڤ پێشانگەهێ دا بتنێ‌ ئەو جوتیار پشكداریێ دكه‌ن یێن بەرهەمێ‌ وان گه‌له‌ك یێ باش بیت و هەژمارا وان جوتیارێن نمونەیی ژی ل دهۆكێ‌ زێدەبووینە.

دهێتە زانین‌ سالانە ل پارێزگەها دهۆکێ  77 هزار تەنێن تری دهێنە بەرهەمئینان و هه‌روه‌سا 150 تەنێن هنگڤینی ژی‌ دهێتە بەرهەمئینان.