لە دیوانی وەزارەتی دارایی کۆبوونەوەیەک لەسەر پرسی یەکخستنی لیواکانی پێشمەرگە بەڕێوەچوو

لە وەزارەتی دارایی بەیانی ئەمڕۆ یەکشەممە ڕێکەوتی 25ـی 09ـی 2022 کۆبوونەوەیەک سەبارەت بە پرسی یەکخستنی لیواکانی وەزارەتی پێشمەرگە بەڕێوەچوو.

لە دیوانی وەزارەتی دارایی کۆبوونەوەیەک بە ئامادەبوونی ئاوات جەناب نووری، وەزیری دارایی و ئابووری، شۆڕش ئیسماعیل وەزیری پێشمەرگە، دکتۆر ئومێد سباح سەرۆکی دیوانی ئەنجوومەنی وەزیران و دکتۆر عەبدولحەکیم خەسرەو سەرۆکی فەرمانگەی هەماهەنگی و بەداواداچوون بەڕێوەچوو.

وەزارەتی دارایی لەبارەی کۆبوونەوەکە ڕایگەیاند: پرسی چارەسەرکردنی بەربەستەکانی بەردەم یەکخستنی لیواکانی وەزارەتی پێشمەرگە تاوتوێ کرا.

ڕاشیگەیاند: کێشەی کەمی پێشینەی مانگانە و گواستنەوەی هەژماری ئەم هێزانە لە هێزەکانی یەکەی 70 و 80 وە بۆ سەر هەژماری وەزارەتی پێشمەرگە باس کرا. جه‌ختیان لە تەرخانکردنی بوودجەی پێویست بۆ لیوا ڕێکخراوەکانی ناو وەزارەتی پێشمەرگە کرد.

وەزیری دارایی و ئابووری بەڵێنی ئەوەی دا کە وەزارەتەکەی پاڵپشتیه‌كی گەورەی یەکخستنی لیواکانی وەزارەتی پێشمەرگەیە.

ئاماژەی بەوەش داوە کە هەموو ئامادەبووان کۆدەنگی ئەوەیان پیشاندا کە بەهەموو لایەکەوە کار لەسەر یەکخستنی ئەو لیوایانە دەکەن و سەرجەم بەربەستەکان وه‌لا دەنێن.