به‌رپرسێكی باڵای یه‌كێتی ئه‌وروپا ئه‌مڕۆ یه‌كشه‌م له‌سه‌ر خۆپیشاندانه‌كانی ئه‌م دواییه‌ی ئێران هاته ده‌نگ و جه‌ختی كرده‌وه كه سه‌ركوتكردنی به‌بێ پاساوی خۆپیشانده‌ران جێگه‌ی قبووڵكردن نییه.
جۆزێپ بۆرێك به‌رپرسی سیاسه‌تی ده‌ره‌وه‌ی یه‌كێتی ئه‌وروپا ڕایگه‌یاند: یه‌كێتی ئه‌وروپا و ته‌واوی وڵاتانی ئه‌ندامی یه‌كێتییه‌كه به‌كارهێنانی هێز و سه‌ركه‌وتكردنی خۆپیشاندانی ئاشتییانه به‌بێ هیچ پاساوێك سه‌ركۆنه ده‌كه‌ن و به‌هیچ شیوه‌یه‌كیش جێگه‌ی قبووڵكردن نییه.
ئه‌مه له‌كاتێكدایه كه ئه‌مڕۆ یه‌كشه‌م خۆپیشاندان و ناڕه‌زایه‌تییه‌كانی ئێران پێی نایه ڕۆژی نۆیه‌مه‌وه، له‌به‌رامبه‌ریشدا هێزه ئه‌منییه‌كان به هه‌موو ئامراز و شێوه‌یه‌ك ڕووبه‌ڕوویان ده‌بنه‌وه و سه‌ركوتیان ده‌كه‌ن.
خۆپیشاندان و ناڕه‌زایه‌تییه‌كان له ئه‌نجامی كوژرانی كچێكی ته‌مه‌ن 22 ساڵی سه‌قزی به‌ناوی ژینا ئه‌مینی دروستبوون له‌لایه‌ن پۆلیسی سه‌پاندنی ڕه‌وشت به تۆمه‌تی شل به‌ستنی سه‌رپۆشه‌كه‌ی كه دوای ده‌ستگیركردنی ئازارێكی زۆر درابوو و دوای مانه‌وه‌ی چه‌ند ڕۆژێك له نه‌خۆشخانه‌یه‌كی شاری تاران، له ڕۆژی هه‌ینیدا به‌هۆی سه‌ختی برینه‌كه‌یه‌وه گیانی له‌ده‌ست دا.
کۆمێنت (0)
تا ئێستا هیچ کۆمێنتێک نەکراوە.