فراکسیۆنی پارتی لە پەرلەمانی کوردستان ڕاگەیەنراوێکی لەسەر بۆردوومانەکانی ئێران بڵاوکردۆتەوە و داوا دەکات کە ڕێز لە هەرێمی کوردستان و خەڵکەکەی بگیرێت لەژێر هیچ پاساوێک جارێکی دیکە دووبارە نەبێتەوە.
فراکسیۆنی پارتی لە پەرلەمانی کوردستان ڕایگەیاند: بە نیگەرانییەکی قوڵەوە ئەمڕۆ چوارشەممە لە چەند ناوچەیەکی جیاوازی هەرێمی کوردستان فڕۆکەی جەنگی ئێرانی بۆردوومانی هاونیشتیمانیانی سڤیلی کرد و لە ئەنجامدا چەند کەسێک شەهید و برینداربوون.
ڕاشیگەیاند: ئێمە ئیدانەی ئەو هێرشانە دەکەین کە خەڵکی سڤیل و قوتابخانە دەکەنە ئامانج و ئەمەش دژی هەموو بنەماکانی مافی مرۆڤە و پەلاماردانی خەڵکی سڤیل تاوانێکی گەورەیە، جگە لەوەش پێشێلکاری سەروەرییە و لەگەڵ بنەماکانی دۆستایەتی یەکناگرێتەوە.
فراکسیۆنی پارتی ئاماژەی بەوەش داوە کە ئەم جۆرە لە پەلاماردان چارەسەر نییە بۆ کێشەکان و سەقامگیری لەم ڕێگەیەوە نایەتە کایەوە، داوا دەکەین ڕێز لە هەرێمی کوردستان و خەڵکەکەی بگیرێت و لەژێر هیچ پاساوێکدا جارێکی دیکە ئەو دیمەنە تراژیدیانە نەبینینەوە کە ئەمڕۆ بینینمان.
کۆمێنت (0)
تا ئێستا هیچ کۆمێنتێک نەکراوە.