پێشنیوەڕۆی ئەمڕۆ چوارشەممە 2022/10/5 نێچیرڤان بارزانی، سەرۆكی هەرێمی كوردستان، پێشوازی لە نیكۆلاس گارنەر، نوێنەری ئەمەریكا بۆ كاروباری باكووری ڕۆژهەڵاتی سووریا و شاندێكی یاوەری كرد.
لە دیدارێكدا كە كونسولی گشتیی ئەمەریكا لە هەرێمی كوردستان ئامادەی بوو، دوایین پێشهاتەكانی سووریا و عێراق و هەڕەشەكانی داعش، پەیوەندیی نێوان لایەنە كوردییەكان و پێكهاتەكان لە سووریا و بارودۆخی كەمپەكان بەتایبەتی كەمپی ئەلهۆل، تاوتوێ كرا.
هەردوولا جەختیان لە گرنگیی بەردەوامیی هاریكاریی هاوبەش بۆ بەرەنگاربوونەوەی تیرۆر و مەترسییەكانی داعش كردەوە كە هێشتا مەترسییەكی ڕاستەقینەیە لە سەر سووریا و عێراق و ناوچەكە، هەروەها بە پێوستیان زانی وڵاتانی ئەورووپا و ناوچەكە بۆ گێڕانەوەی هاووڵاتیانیان لە كەمپی ئەلهۆل لە سووریا بۆ وڵاتەكانیان، هاوكار بن.
لەمبارەیەوە نێچیرڤان بارزانی دووپاتی كردەوە كە تیرۆر بە تەنیا بە هێزی چەك لەناو ناچێت، بەڵكو بۆ نەهێشتنی تیرۆر دەبێ لە ڕێگەی پەروەردە و قوڵكردنەوەی كولتووری لێبوردەیی و یەكترقبووڵكردن و پێكەوەژیان، ڕووبەڕووی بیر و ئایدۆلۆژیای توندڕەوی و توندوتیژی ببینەوە.
پێویستیی گفتوگۆ و یەكڕیزیی نێوان لایەنە كوردییەكان و پێكهاتەكانی دیكە لە سووریا، دۆخی ناوچەكە بەگشتی و چەند پرسێكی دیكەی جێی بایەخی هاوبەش، تەوەرێكی دیكەی دیدارەكە بوو.
نێچیرڤان بارزانی: تیرۆر بە تەنیا بە هێزی چەك لەناو ناچێت
100%
کۆمێنت (0)
تا ئێستا هیچ کۆمێنتێک نەکراوە.