ئەنجوومەنی ئاسایشی هەرێمی کوردستان ڕاگەیەنراوێکی لەسەر تەقینەوەکەی ئەمڕۆ هەینی 07ـی 10ـی 2022 هەولێر بڵاو کردەوە و جەخت دەکاتەوە کە بکەرانی ئەم کردەوە تیرۆریستییە بە سزای یاسایی خۆیان دەگەن.
لە ڕاگەیەنراوەکەی ئەنجوومەنی ئاسایشی هەرێمی کوردستان هاتووە کە "کاتژمێر 12:20ـی پاشنیوەڕۆی ئەمڕۆ هەینی، لە گەڕەکی سەربەستیی شاری هەولێر لە کردەوەیەکی تیرۆریستیدا ئەفسەرێکی ئاژانسی پاراستن و زانیاری/ زانیاریی سەر بە ئەنجوومەنی ئاسایشی هەرێمی کوردستان بە ناوی هاوکار عەبدوڵڵا ڕەسووڵ، کە لە ماوەی ڕابردوودا بەهۆی ناکۆکی و ململانێیەکانی ناو دەزگای زانیاری ئەرکەکەی خۆی گواستبوویەوە بۆ شاری هەولێر، لە ڕێگەی دوو بۆمبی لکێندراو بە ئۆتۆمبێلەکەیەوە کرایە ئامانج و بەداخەوە شەهید بوو."
ئەوەشی خستەڕوو کە "هاوکات چوار سەرنشین کە لە هاوسەرەکەی و دوو منداڵی و خوشکێکی پێک هاتبوون، بریندار بوون."
هەر لە ڕاگەیەنراوەکە ئاماژە بەوەش دراوە کە "ئەنجوومەنی ئاسایشی هەرێمی کوردستان زۆر بە توندی ئەم کردەوە تیرۆریستییە ترسنۆکانەیە سەرکۆنە دەکات و لێکۆڵینەوەکانیان لەمبارەیەوە دەست پێ کردووە و بکەرانی ئەم کردەوە تیرۆریستییە بە سزای یاسایی خۆیان دەگەن."
کۆمێنت (0)
تا ئێستا هیچ کۆمێنتێک نەکراوە.