سەرۆکی حکوومەت و وەزیری دەرەوەی شانشینی یەکگرتوو لە پەریوەندییەکی تەلەفۆنیدا جەختیان لە گرنگیی برەودان بە پەیوەندی دۆستانە و بەهێزی نێوان هەردوولا کردەوە.
مەسرور بارزانی، سەرۆکی حکوومەتی هەرێمی کوردستان و جەیمس كلیڤەرلی، وەزیری دەرەوەی شانشینی یەکگرتوو ئێوارەی ئەمڕۆ هەینی 07ـی 10ـی 2022، پەیوەندییەکی تەلەفۆنییان ئەنجام دا.
لە پەیوەندییەکەدا، سەرۆکی حکوومەت پیرۆزبایی دەستبەکاربوونی لە وەزیری دەرەوەی شانشینی یەکگرتوو کرد و هیوای سەرکەوتنی لە ئەرکەکەیدا بۆ خواست. هەروەها هەردوولا جەختیان لە گرنگیی برەودان بە پەیوەندی دۆستانە و بەهێزی نێوان هەرێمی كوردستان و شانشینی یەکگرتوو كردەوە.
وەزیری دەرەوەی شانشینی یەکگرتوو، پرسە و هاوخەمی خۆی بۆ گیان لە دەستدانی خەڵکی بێتاوان لە هێرشەکانی ئەم دواییەی سەر هەرێمی کوردستان دەربڕی.
هەر لە پەیوەندییە تەلەفۆنییەکەدا هەردوولا هاوڕابوون لە سەر بەردەوامبوونی پەیوەندیی و هەماهەنگیی نێوانیان.
کۆمێنت (0)
تا ئێستا هیچ کۆمێنتێک نەکراوە.