هه‌ولێر یه‌كه‌م یاریی ئه‌م وه‌رزه‌ی به‌ شكست ده‌ست پێ كرد

یانه‌ی هه‌ولێر ئێواره‌ی ئه‌مڕۆ دووشه‌م له‌ یه‌كه‌م یاریی ئه‌م وه‌رزه‌ی خولی نایابی عێراق (2022-2023) له‌ ده‌ره‌وه‌ی یاریگه‌ی خۆی به‌ ئه‌نجامی 2-1 گۆڵ به‌رامبه‌ر یانه‌ی كه‌ربه‌لا دۆڕا.

له‌ گێمی یه‌كه‌می یارییه‌كه‌دا كه‌ یانه‌ی هه‌ولێر له‌ ده‌ره‌وه‌ی یاریگه‌ و دوور له‌ جه‌ماوه‌ری یاری ده‌كرد، به‌بێ گۆڵ به‌رامبه‌ر یانه‌ی كه‌ربه‌لا یه‌كسان بوو‌.

له‌ گێمی دووه‌میشدا یانه‌ی هه‌ولێر له‌ ڕێگه‌ی مازن فه‌یاز و به‌ ڕێگه‌ی لێدانی سزا گۆلی یه‌كه‌می یارییه‌كه‌ی تۆمار كرد، به‌ڵام یانه‌ی كه‌ربه‌لا پاڵپشت به‌ یاریگه‌ و جه‌ماوه‌ر توانی ئه‌نجامی یارییه‌كه‌ هه‌ڵگه‌ڕێنێته‌وه‌ و له‌ خوله‌كی 84 له‌ ڕێگه‌ی یاریزان محه‌مه‌د قاسم گۆڵی یه‌كسانبوون تۆمار بكاته‌وه‌، به‌ر له‌ ته‌واوبوونی یارییه‌كه‌ش له‌ خوله‌كانی زیادكراودا زێدان عه‌بدولجه‌بار توانی گۆڵی بردنه‌وه‌ش بۆ یانه‌ی كه‌ربه‌لا تۆمار بكات و به‌مه‌ش یه‌كه‌م سه‌ركه‌وتن و 3 خاڵی ئه‌مساڵی خولی نایابی عێراق پێشكه‌شی یانه‌كه‌ی بكات.

ئه‌مه‌ له‌كاتێكدایه‌ كه‌ یانه‌ی هه‌ولێر بۆ ئه‌م وه‌رزه چه‌ندان گرێبه‌ستی نوێی ئه‌نجامداوه‌ به‌ ئامانجی ئه‌وه‌ی‌ پله‌كانی پێشه‌وه‌ی خولی ئه‌مساڵی نایابی عێراق به‌ده‌ستبێنێ.