سه‌رۆكی لبنان ئه‌مڕۆ چوارشه‌م بڕیاری دا سه‌رجه‌م په‌نابه‌ره سوورییه‌كان بگه‌ڕێنێته‌وه وڵاته‌كه‌یان و ئه‌م هه‌ڵمه‌تی گه‌ڕانه‌وه‌شیان له هه‌فته‌ی داهاتووه‌وه ده‌ست پێ ده‌كات.
میشال عه‌ون سه‌رۆكی لبنان ڕایگه‌یاند: له هه‌فته‌ی داهاتوودا ده‌ست ده‌كه‌ین به هه‌ڵمه‌تی به زۆر گه‌ڕانه‌وه‌ی په‌نابه‌ره سوورییه‌كان و هه‌ڵمه‌ته‌كه‌ش به چه‌ند قۆناغێك ئه‌نجام ده‌درێت.
ئاماژه‌ی به‌وه‌ش دا كه له وڵاته‌كه‌یان دووباره ده‌ست ده‌كه‌نه‌وه ده‌رهێنانی نه‌وت و غاز له سنووره ده‌ریاییه‌كانی باشوور دوای ڕێككه‌وتن له‌گه‌ڵ ئیسڕائیل كه له ماوه‌ی ڕأبردوودا به‌شێوه‌ی ناڕاسته‌وخۆ دانوستانمان له‌گه‌ڵیان كرابوو.
سه‌رۆكی لبنان جه‌ختیشی كرده‌وه كه شێوازی حوكمڕانی وڵات ده‌گۆڕن و چاكسازی له كاری دامه‌زراوه و ئیدارییه‌كان ده‌كه‌ن و هه‌موو ئه‌م كاره‌شیان بۆ خزمه‌تكردنی زیاتری گه‌لی لبنانه.
جێی باسه ماوه‌ی چه‌ندین ساڵه به هه‌زاران په‌نابه‌ری سووری به‌هۆی ناله‌باری بارودۆخی سیاسی و به‌رده‌وامی شه‌ڕ و پێكدادانه‌كان ناوچه‌كانیان جێهێشتووه و ڕوویان له لبنان كردووه، به‌شێك له چاودێرانی ئابووریش پێیانوایه خراپی بارودۆخی ئێستای لبنان به‌شێك په‌یوه‌ندی به‌و په‌نابه‌رانه هه‌یه و وڵاته‌كه‌یان چیتر ناتوانێ ئه‌م ژماره زۆره‌ی په‌نابه‌ر له‌خۆ بگرێت.
کۆمێنت (0)
تا ئێستا هیچ کۆمێنتێک نەکراوە.