کەسێک لە کاتی ڕاوەماسی لە گۆمی چناران خنکا

کاتژمێر01:36 دوانیوەرۆی ئەمڕۆ هەینی 14ـی 10ـی 2022 کەسێک لە گۆمی چنارانی ڕووباری جوندیان لە سنووری قەزای ڕواندز خنکا.

بەڕێوەبەرایەتی بەرگری شارستانی سۆران ڕایگەیاند: هاووڵاتییەک دوای ئەوەی کەوتە ڕووبارى جوندیان گۆمى چناران، دەستبەجێ تیمى مەلەوانى سەر بە بەرێوەبەرایەتیمان دەرچوون بۆ شوێنى ڕووداو و دەستیان کرد بە گەڕان و پشکنین دواى نزیکەى کاتژمێرێک تەرمەکەى دۆزرایەوە و ڕەوانەى پزیشکى دادى سۆران کرا.

ڕاشیگەیاند: بەپێى ڕاپۆرتى تیمەکانمان هاووڵاتییەکە ناوى (عەبدوڵڵا شەهاب نەجمەدین)ـە دانیشتووى گەرەکى هەرێمە لە قەزاى سۆرانە، لەدایکبووى (1995)ـە، لە کاتى ڕاوەماسى دووچارى خنکان بووە و بەتەنها بووە.

بەرگری شارستانی سۆران ئاماژەی بەوەش دا کە ئەمە لە کاتێکدایە لە سەرەتاى ئەمساڵەوە تاکو ئێستا (12) هاووڵاتى خنکاون بە ڕووداوى جیاجیا لە ڕووبارەکانى سەر بە سۆران.