هەولێر؛ چوار پڕۆژەی دیکە جێبەجێ دەکرێن

لە هەولێر، بە زیاتر لە ملیارێک دینار چوار پڕۆژەی دیکەی گرنگ دەست بە جێبەجێکردنیان دەکرێت.

ڕاگەیاندنی پارێزگای هەولێر ڕایگەیاند: لە چوارچێوەی پڕۆژەکانی پەرەپێدانی پارێزگای هەولێر و گەیاندنی خزمەتگوزاریی پێویست و دەستی ئاوەدانی زیاتر بە شێوەیەکی یەکسان و بەبێ جیاوازی لەنێوان سەنتەری شار و گوند و ناحییە و قەزاکان، لەماوەی دووساڵی ڕابردوودا زۆرترین پڕۆژەی خزمەتگوزاریی لەسنووری پارێزگای هەولێر ئەنجام دراوە، ئێستاش بە گوژمەی ملیارێک و 48 ملیۆن و 231 هەزار دینار، چوار پڕۆژەی دیکەی گرنگی خزمەتگوزاریی لەسەر بوودجەی پڕۆژەکانی پەرەپێدانی پارێزگای هەولێر و 15%ی داهاتی شارەوانی هەولێر دەست بەجێبەجێکردنیان کراوە.

هەر لە ڕاگەیەنراوەکە پارێزگای هەولێر ئاماژەی بە پڕۆژەکان داوە کە بریتین لەمانە:-

- پڕۆژەی دروستکردنی شەقامێکی 30 مەتری لەگەڵ ئاوەڕۆی لولەیی لە تەنیشت شوقەکانی نەورۆز سیتی بەگوژمەی (440 ملیۆن و 480 هەزار دینار) لەسەر بوودجەی پڕۆژەکانی پەرەپێدانی پارێزگای هەولێر بەشێوەی بەڵێندەرایەتی و ماوەی تەواوکردنی پڕۆژەکەش (120) ڕۆژە.

- پرۆژەی قەشتکردن و قیڕتاوکردنی شەقامی شەهید سامی لە گەڕەکی گلکەند بە گوژمەی(219 ملیۆن و 750 هەزار دینار) لەسەر داهاتی 15% سەرۆکایەتی شارەوانی هەولێر و بەشێوەی بەلێندەرایەتی و ماوەی تەواوکردنی پڕۆژەکەش (60) ڕۆژە.

- پڕۆژەی ڕاخستنی چینی ستایبلایزەر بۆ سێ شەقام لە گەڕەکی قەتەوی بە گوژمەی (59 ملیۆن دینار) لەسەر داهاتی 15%ـی سەرۆکایەتی شارەوانی هەولێر و بەشێوەی بەڵێندەرایەتی و ماوەی تەواوکردنی پڕۆژەکەش (30) ڕۆژە.

- پڕۆژەی (دروستکردنی شەقامێکی 20 مەتری تەریب بە کەندی کۆرنیش لە گەرەکی زیلان (5)ـی حەسارۆکان و قیڕتاوکردنی چوار شەقام لە گەڕەکی هاوکاری (5)ـی حسارۆکان بەرامبەر مزگەوتی شێخ بیلال خەیلانی و قیڕتاوکردنی گۆڕەپانی گەراجی ئۆتۆمبێل پێش پارکی پێشمەرگە) بە گوژمەی (329 ملیۆن و 1 هەزار دینار) لەسەر بوودجەی پڕۆژەکانی پەرەپێدانی پارێزگای هەولێر بەشێوەی بەڵێندەرایەتی و ماوەی تەواوکردنی پڕۆژەکەش (150) ڕۆژە.

پارێزگای هەولێر ئاماژەی بەوەش داوە کە جگە لەدەستکردن بەم پڕۆژانە دەرخستەی پێویست بۆ ئەنجامدانی چەندین پڕۆژەی دیکەش ئامادەکراوە، دوای دابینکردنی بوودجەی پێویست دەست بەجێبەجێکردنیان دەکرێت.