جێگری سه‌رۆكی ئه‌نجوومه‌نی نوێنه‌رانی عێراق ئه‌مڕۆ دووشه‌م داوای له وه‌زیری گواستنه‌وه‌ی حكوومه‌تی ئیتحادی كرد كاره‌كانی فرۆكه‌خانه‌ی كه‌ركووك بووه‌ستێنێت، به‌هۆی بوونی گومانی گه‌نده‌ڵی له پرۆژه‌كه و كێشه‌ی ئه‌منی و ئاسته‌نگی ئیداری و هونه‌ری تیایدا.
شاخه‌وان عه‌بدوڵا جێگری سه‌رۆكی ئه‌نجوومه‌نی نوێنه‌رانی عێراق له بەیاننامه‌یه‌كیدا به‌رپرسیارێتی كردنه‌وه‌ی فڕۆكه‌خانه‌ی كه‌ركووك و به‌و خێراییه‌ی خسته ئه‌ستۆی ده‌سه‌ڵاتی فرۆكه‌وانی مه‌ده‌نی و وه‌زاره‌تی گواستنه‌وە و لایه‌نه په‌یوه‌نداره‌كان كه بێ ره‌چاوكردنی لێكۆڵینه‌وه له دۆسییه‌كانی گه‌نده‌ڵی و چاره‌سه‌ركردنی كێشه هونه‌ری و ته‌كنیكییه‌كان، فرۆكه‌خانه‌كه‌یان كردۆته‌وه .
شاخه‌وان عه‌بدوڵا له به‌یاننامه‌كه‌دا هه‌روه‌ها ته‌ئكیدی له گرینگی پرۆژه‌ی فرۆكه‌خانه‌ی كه‌ركووك كرده‌وه كه دەبوو پێش پارێزگاكانی تر بكرێته‌وه وه‌ك ماف و شایسته‌یه‌ك بۆ رۆڵه‌كانی پارێزگاکە، وێڕای سوودی ئابووری و دارایی و ره‌خساندنی هه‌لی كار پشتیوانی ئابووری و داراییەکانی جولەی بازرگانی لە پارێزگای كه‌ركووك .
ڕاشیگەیاند: پشتیوانی جێبه‌جێكردنی پرۆژه ستراتیژییه‌كانین له پارێزگای كه‌ركووك، به‌ڵام به‌داخه‌وه گومانی گه‌نده‌ڵی له ورده‌كارییه‌كانی پرۆژه‌كه‌دا هه‌یه، ئه‌گه‌ر رێوشوێنی خۆپارێزی و تایبه‌ت به لایه‌نی ئه‌منی و دۆسییه‌كانی گه‌نده‌ڵی یه‌كلابكرێته‌وه و كێشه‌كان چاره‌سه‌ر بكرێت، ده‌توانرێت کارکردن سه‌رله‌نوێ لە فرۆكه‌خانه‌ی كه‌ركووك دەست پێ بکاتەوە.
کۆمێنت (0)
تا ئێستا هیچ کۆمێنتێک نەکراوە.