شێوازی حوکمڕانی و ژیانی کۆمەڵایەتی و سەربازی و ئابووری شارستانییەتەکانی هەزارەی دووەمی پێش زایین لە کوردستان دەخرێتەڕوو

سیمپۆزێۆمی زانستیی شوێنەواری تایبەت بە هەزارەی دووەمی پێش زایین تایبەت بە کوردستان بەڕێوە دەچێت.

کەیفی مستەفا بەڕێوەبەری گشتیی شوێنەواری هەرێمی کوردستان لە لێدوانێکدا بە فەرمانگەی میدیا و زانیاری حکوومەتی هەرێمی ڕاگەیاند، سیمپۆزێۆمی زانستی شوێنەواری تایبەت بە هەزارەی دووەمی پێش زایین تایبەت بە کوردستان بە هاوبەش لە نێوان بەڕێوەبەرایەتیی شوێنەواری هەرێمی کوردستان و پەیمانگای فەڕەنسی IFPO لە ڕۆژانی یەکشەممە و دووشەمە (23 - 24) تشرینی یەکەم لە هۆڵی توانا مرۆییەکانی وەزارەتی شارەوانی و گەشتوزار لە گەڕەکی ڕووناکی بەڕێوە دەچێت.

کەیفی مستەفا گوتیشی لە دوو رۆژی سمپۆزێۆمدا، 12 بابەتی زانستی لەلایەن چەند پسپۆرێکی بواری شوێنەوار لە ناوخۆ و دەرەوە بەتایبەتی ئەنجامی نوێی هەڵکۆڵین لە هەرێمی کوردستان بۆ سەردەمی هەزارەی دووەمی پێش زایین (4 هەزار ساڵ پێش ئێستا) لەگەڵ هەندێ کار و چالاکیی شوێنەوارەکانی هەولێر و سلێمانی و دهۆک پێشکەش دەکرێن.

بە گوتەی بەڕێوەبەری شوێنەواری هەرێمی کوردستان، لە لێکۆڵینەوە زانستییەکانی شوێنەواردا، حوکمڕانی ئەوکات و شێوەی ژیانی کۆمەڵایەتی و سەربازی و ئابووری و جۆری حوکمڕانییەکەیان و پەیوەندییان لەگەڵ شارستانییەتەکانی دەوروبەر دەخرێنە ڕوو. بەتایبەتی گرنگی بە رۆڵ و کاریگەری لەسەر بونیادنانی شارستانییەت لە ناوچەی میزۆپۆتامیا لەلایەن هەردوو شارستانییەتی ئاشووری و میتانییەکانەوە دەدرێت.