وەزیری پەیوەندییەکانی عێراق ئاشکرای دەکات کە پێشبینی دەکات حکوومەتی داهاتووی عێراق باج لەسەر کۆمپانیاکانی مۆبایل و ئینتەرنێت هەڵوەشێنێتەوە، بەمەش نرخی کارتی مۆبایل و ئینتەرنێت هەرزان دەبێت.
ئەركان شەهاب شەیبانی وەزیری پەیوەندییەكانی عێراق دووپاتی كردەوە كە پێشنیازێكی پێشكەش بە لیژنەی وەزاری ئابووری كردووە بۆ هەڵوەشاندنەوەی ئەو باجەی كە بەسەر بەكارهێنەرانی مۆبایل و ئینتەرنێتدا سەپێنراوە، بە لەبەرچاوگرتنی ئەوەی كە چیتر ڕەوا نییە.
هەروەها ڕایگەیاند: پێشنیاری هەڵوەشاندنەوەی باجی 20%ی كۆمپانیاكانی مۆبایل و ئینتەرنێتم وروژاند، چونكە یاسادانانی ئەم یاسای باجە لە ساڵی 2014 بوو، ئەو كاتەی دەوڵەتی عێراق تووشی قەیرانی دارایی ببوو و لە کاتی جەنگی داعش بوو.
باسی لەوەش کرد کە هۆکارێکی دیکە ئەوەیە کە ئێستا یاسای بوودجە هەڵپەسێردراوە و ناتوانرێت بەبێ یاسا باج لە هاووڵاتییەکە وەربگیرێت، هاووڵاتیی عێراقیش ئێستا 20% زیاتر لە نرخی کارتەکە دەدات بەبێ یاسا.
وەزیری پەیوەندییەكانی عێراق ئاماژەی بەوەش دا کە ئێمە نووسراومان ئاڕاستەی فەرمانگەی چاودێری دارایی و ئەنجوومەنی وەزیران کردووە بۆ هەڵوەشاندنەوەی ئەم باجە، پێشبینیش دەکەین حکومەتی داهاتوو هەڵیبوەشێنێتەوە.
کۆمێنت (0)
تا ئێستا هیچ کۆمێنتێک نەکراوە.